1 Ngweno chivumilano chotanga chakabeli nemilawo yokunamata akale nobugalo buchena bopenyika. 2 Nokuti itente lyakaba likalonganywa, lyokuzhe, mwakaba muli nechigajiko chomwenje, netafula nechinkwa chichena, linowhi Bugalo buChena. 3 Kuseli kwedabiko lyabili kwakabeli netente lyakabewhi Bugalo buChena, 4 kuli nedebulilo lyendalama lyokufhungayijila akale negwati lyechivumilano likajululwa nendalama kumapazu ose, mukati mwalyo muli nefhukwana yendalama yokulondotela imana, neswimbo yaAloni yakakwinila namabwe echivumilano, 5 pezhulu pegwati pakaba peli namakelubhimu olukujo akasikatila chibhula cheshe. Ngweno atingalebeleke zwizhele pezhulu pezwi zwinhu.

6 Mabambanyilo yaya, atiwa, batebuji balungwina mazhuba ose mutente lyokuzhe beta unshingo wabo, 7 koga munalyabili untebuji unkulwana ega chete ndiye wakabengwina kamwempela negole, elinelopa lyalopila iye akale bakachinya nokusoziba. 8 Nezwi uMpepo uNchena unotondejela kuti inzila yokungwina mubugalo buchena ayijanu ikazhulwa nokuti ibhazu lyokutanga lyedhumba lyokuzhe lichimile, 9 chili chitondejelo mumazhuba Anasi. Yezwi zwiinoleba kuti zwipo nemibhayilo zwakapilwa azwijakabetubula kululamisa luyeyo lonamati, 10 asi zwinongoba zwokulya nozwokunwa akale nozwamashambisilo alosiyanasiyana, zwakaba zwikamisilwa umbili, kuswikila unshaji wokululamisa.

11 Asi Kristo paakaboneka sontebuji unkulwana wezwinhu zwibuya zwakezha, nokudalo nomukupindila mudhumba igulwana akale lilopelelejwa lisilotiwa namaboko onhu, lisi ilyo lyakabumbilwa yezwi 12 iye wakangwilaatu muBugalo Buchena, esijilobhata ilopa lyembuji kana lyotunamani koga nelopa lilye, nezwo wakatiwanila kumunulwa kusinopela. 13 Nokuti kana ilopa lyembuji nenkunzi, nokushashwa kwabanhu baloswibha nelota lyetokazi zwishambija mukuchenesa umbili, 14 zwilokosha chini kuti ilopa lyaKristo wakazwipila noMpepo wokusinopela kunaMwali esina chibi, chenesani luyeyo lwenu kuva kumishingo ilofa kuti mushingile Mwali umpenyu.

15 Nezwo ndiye undebeleli wechivumilano chipya, kuti yabo baloshobwa betambule chibimbiso chefuma isinopela, sezwo lufu lwakatikana lunobamunula muzwibi zwabo pasi pechivumilano chokutanga.

16 Nezwo kana peli nolukwalo lwokukoba ifuma, lufu loyo wakalukwala lulokwelela kusumikijwa. 17 Nokudalo lukwalo lokukobana ifuma lunoshinga chete palufu, akale aluna isimba kana mweni walo echili umpenyu, 18 ndizo chivumilano chokutanga chisakamiswa pesina ilopa. 19 Zwisungo zwomulawu zwose pazwakashomejelwa naMozesi kubanhu bose etobeleja mulawo, wakatola ilopa lyamanamani nelyembuji, nevula nobukuse bushaba, nakatabi kehaisopi, akashashaila pezhulu pewhalo nabanhu bose, 20 wakati, "Yeli ilopa lyechivumilano Mwali chaakabalaya kuti belondote." 21 Nenzila yakaleyo wakashashaila nelopa inhumba nezwibiya zwinoshingiswa pakunamata. 22 Chokomende, pasi pomulawu posa zwose zwinhu zwinocheneswa nelopa, akale kuzhe kwokuti kupilwe ilopa, apana kulekejelwa kwoluchinyo.

23 Zwakabakakwelela kuti zwitojaniso zwezwinhu zwokudenga zwicheneswe nenzila yakadai, koga zwinhu zwiko kudenga ndizwo kasa zwilokwelela kucheneswa nemitebulo mibuya kupinda yezwi. 24 Nokuti Kristo aajakabanhu angwina mubugalo buchena bulobakwa namaboko, chili chitojaniso chechokomende, koga wakangwina kudenga komene, ngweno eboneke mbeli kwaMwali emilila isu. 25 Akutoba kuti egale ezwipila kanji, sezwo untebuji unkulwana engwina Bugalo Buchena kasa, igole negole nelopa lisili lilye, 26 nezwo, waluyabula kanji kuva pakubumbwa kwenyika. Koga sezwazwili wakaboneka kamwempela chete kumapejelejo kwonshaji, koobhisa luchinyo nenzila yokuzwipila kukwe. 27 Somwazwilobambwa, kuti unhu unofa kamwempela, mushule mwezwo kunozha kutongwa, 28 nokudalo Kristo wakapilwa kamwempela kubhisa luchinyo lwabanji, unoobuya kabili, esinozhila luchinyo asi ezhila koochija yabo baneshungu jokuundindila.