1 Ngweno chikulwana munazwose zwatikumuleba ndiyezwi, tinanaye untebuji unkulwana uli ali, iye ugele kululyi lwechibhula chobushe Chobushaninga kudenga, 2 unshingi muchikombelo chili tente ijena lyechokomende lilomiswa naTezi koga kusi unhu.

3 Nokuti wose untebuji unkulwana unogajwa kuti epile zwipo nemibhailo, nokudalo zwinodikana akale kuti yoyo untebuji ebenacho chaanopila 4 Nokuti ngana wakaba eli penyika, aajaloba untebuji kana, nokuti baipo batebuji banopila zwipo betobeleja mulawo. 5 Banoshingila chitojaniso akale nontuzi wechikombelo chokudenga, nokuti Mozesi paakabeda kubaka itente, wakalaywa naMwali, kuti, "Bona kuti unota zwose sechikwejaniso chawakatondejwa pedunhu." 6 Koga sezwazwili, Kristo wakawana bushingili bubuyanana kasa kupinda bwantolo sechivumilano chaanomililila chili chibuyanana, sezwachilobakilwa pozwibimbiso zwibuyanana.

7 Nokuti ngana chivumilano chotanga chakaba chisilolunduka, akujaloba nechabili. 8 Koga unobawana belinondandu paanoti,

"Mazhuba akumuzha, unodalo Tezi,

yopo pandichota chivumilano chipya nengumba ya izilayeli akale nengumba yaJuda,

9 zwisi sechivumilano chandakata namatategulu abo

pezhuba lindakababhata noluboko ndibabhisa munyika yeIjipiti,

nokuti abajakandila mbeli muchivumilano changu,

nokudalo namibo andijakabayeya, unodalo Tezi.

10 Yechi ndicho chivumilano chandichata nengumba yaIzilayeli,

mushule mwamazhuba yayo unodalo Tezi,

ndinoobiga milawo yangu mundangalilo jabo,

ndiyikwale mumwoyo yabo,

akale ndibe Mwali wabo,

naibo banooba banhu bangu.

11 Akale abatoolayijana mububwanakwaina bwabo

kana ani naani aatolayija mwanakwaina uwe eti,

‘Ziba Tezi.’

nokuti bose banoondiziba imi,

kuvila kuntukutuku zwinda kunkulwana wabo.

12 Nokuti ndinooba neshe pezwibi zwabo,

akale anditokumbulukwa luchinyo lwabo akale."

13 Pakuleba nezwechivumilano chipya unota chotanga kuti chibe chisina nshingo. Chisichina unshingo nokubachantolo chabulobwandila.