1 Nezwo kana kuli nokusungwajwa munaKristo, kana ini zwinonyungumula ludo, kana ini zwinoshingilana mumpepo, kana zwoludo neshe, 2 zhajikijani lushanto lwangu nokuba nendangalilo imwempela, noludo lumwempela, nemiyeyo nendangalilo imwempela. 3 Musite zwinhu mubuchiba kana kushiya, koga mukuzwininipisa mutole bamwe sababuya kunamwi. 4 Umwe noomwe wenu esilinge zwaanoda iye chete, koga nezwinodiwa nabamwe. 5 Ibani nendangalilo yeyi pakati penu, ili yenu munaKristo Jesu,

6 Iye, kojoba akabeli muchimo chaMwali,

Ajakayeya kuzwitondejela nesimba kuti unokwelana naMwali,

7 koga wakasiya zwose,

akatola chimo choshingi,

akaba sonhu

akale akaboneka muchimo chonhu.

8 Wakawanikwa muchimo chonhu, akazwininipisa akale akawhilila kuswikila afa,

kojoba lufu lopanchinjikwa.

9 Nokudalo Mwali wakokuja kasakasa,

akompa izina lipo pezhulu pamazina ose,

10 Nokudalo izina lyaJesu likujwe,

zwibumbwa zwose kudenga penyika nomudako lyenyika

zwilokwelela kufugama,

11 akale indimi jose jipupule kuti Jesu Kristo ndiTezi,

kuti lukujo lube kunaMwali Tate.

12 Nokudalo, badiwa bangu, sezwo muwhilila unshaji wose, ngweno kusibe ndilipo koga kanji kube munshaji ndisipo, shingani luchijo lwenu nokutya nokuteketa, 13 nokuti Mwali ukumushinga mwamuli, kuti mude akale muzhajikije chinangwa chiche chibuya.

14 Itani zwinhu zwose musinongunguna kana kunyenyeja, 15 kuti musibe nondandu mubebabuya, bana baMwali basina luchinyo pakati pechizwalwa chakakovomala akale chakalasha bunhu bwacho bwakalulama, pakati pabo mongaima somwenje munyika, 16 bhatililani kuwhi lyobupenyu, kutila kuti muzhuba lyaKristo ndishiye kuti andijakalabukila zwisipo kana kuti ndakashingila zwisipo.

17 Kojoba ndikadilwa sontebulo wokupila umpilo wokudimbwa kwenu, ndoshantilwa akale ndonakilijwa namwi mose. 18 Zwakadalo namwibo mokwelela kushanta nokunakilijwa nami.

19 Ndinobimba munaTezi Jesu kutuma Timoti kwamuli nokukambija, kutila kuti ndishantiswe nokuwha inyaya pezhulu penu. 20 Andina unanga saiye, uchabiga bugalo bwenu mumwoyo mumwe zwechokomende. 21 Bose bamwe banolinga zwobupenyu bwabo kusi zwaJesu Kristo. 22 Koga kubimbika kwaTimoti mokuziba, somwananhulumyana natate, kuti wakashinga chini nami mundebo imbuya. 23 Ndinobimba nezwo kuuntuma nokukambija pandichabona kuti ndotiwa chini, 24 akale ndinobimba munaTezi kuti munshaji umfupi imi nokwangu bo ndozha. 25 Ndazwiyeya kasa kuti nditumile kwamuli Epafodaitasi mwanakwaina nonshingikwaina wangu, nondwikwaina, untumwa wenu akale elinshingi kundibhancha zwandinoshaiwa, 26 nokuti wabemuzwimba mose, akale eyabula nokuti mwakawha kuti wabelwala. 27 Chokomende wakabelwala, wakajofa. Asi Mwali wakonwhila ishe, kusi iye chete koga namibo, kuti ndisibe neshungu pezhulu peshungu. 28 Nokudalo imi ndimi ndilosungwala kasa kuuntuma, nditila kuti mushante nokuumbona kabili, kutila kuti kubilila kwangu kudelele. 29 Nezwo untambuleni munaTezi nolushanto lwose, akale mukuje banhu bakadai, 30 nokuti wakajofila unshingo waKristo, ebiga bupenyu bubwe mugubaji kutila kuti epejeleje unshingo wenu imwi umusakatubula kuta.