1 Nokudalo, banakwaina bangu, bandinoda nokuzwimba, lushanto nechilemba changu, imani mwakasima nenzila yeyi munaTezi, badikani bangu.

2 Ndimubweta Yudiya, naSintiki kuti bevumilane munaTezi. 3 Akale ndokukumbila bo, iwi kwaina wangu wechokomende, kuti ubhanche banhukaji yaba, nokuti bakashinga pamwepela nami mundebo imbuya, naKilementi nabamwe bose bashingikwaina bangu, banamazina abo muwhalo yobupenyu.

4 Shantani munaTezi unshaji wose, akale ndinoti, Shantani.

5 Banhu bose ngebezibe kugontama kwenu. Tezi wabapelyo. 6 Musiyabujwe kana neni, koga muna zwose nomunamato nokubweta kuna kuboka mute kuti zwikumbilo zwenu zwizibikane kunaMwali. 7 Akale lunyalalo lwaMwali, lunopinda kuwhisisa kose, lunolondota myoyo nendangalilo jenu munaKristo Jesu.

8 Kumapejelejo, banakwaina, chose chingaba ilebeswa, chose chinokujwa, chose chilolulama, chose chiloshambijika, chose chibhodo, chose chinolemekejwa, kana peli nezwibuya, kana peli nezwinokwelela kukujwa, yozwi zwinhu muzwiyeye. 9 Zwamwakalayijwa nezwamwakatambula nezwamwakawha nezwamwakabona kunami, zwiteni, Mwali wolunyalalo unooba namwi.

10 Ndoshanta kasa munaTezi kuti ngweno mwamusilija chibilailo chenu nami, chokomende mwakabebilaila nezwangu, koga amujakabelina chibaka. 11 Kusi kuti ndikumulilijika nokushayiwa, nokudalo ndakalayijwa kuti, muna chipi chimo chandili, ndigutikane. 12 Ndokuziba kushayiwa, akale ndokuziba kufuma, muna chipi kana chipi chimo ndakalayijwa isiswa lyokumilana nobuji, akale nezhala, buwandi nokushayiwa. 13 Ndotubula kuta zwinhu zwose munaiye unondisimisa.

14 Nezwo jakabeli ishe jenu kuti mukobelane nami injabulo jangu. 15 Akale imwi baFilipi mozwiziba yezwi kuti pandakatanga kubhaunula indebo imbuya kunamwi, pandakabhuda muMasedoniya, apana igubungano lyakabhatana nami penyaya yokupa nokutambula kuzhe kwenu chete, 16 nokuti ndili kuTesalonika mwakatumija lubhancho kusi kamwempela. 17 Akutoba kuti ndimushaka chipo, koga ndimushaka ingwano ichopamija indipo yenu. 18 Ndakatambula indipo izhele, akale zwilopamijilwa, ndilozhajwa, ndakatambula zwipo zwimwakatumija kunaEpafodaitasi, umpilo unonhuwilila, untebulo unotambulika akale unoshantisa kunaMwali. 19 Mwali wangu unomukashulila zwose zwamunoda zwikwendelana nefuma nokungaima kukwe munaKristo Jesu. 20 Ngakube lukujo kunaMwali Tate bedu kwemisi isinopela. Ameni.

21 Mumuse bachena bose munaKristo Jesu. Banakwaina bandinanabo bamumumusa. 22 Bachena bose bakumumusa kasa bengumba yaSiza.

23 Chipiwo chaTezi Jesu Kristo ngachibe nompepo wenu.