1 Imi Paulu, umpositoli waKristo Jesu nechido chaMwali, akale naTimoti mwanakwaina wedu.

2 Kubachena nabanakwaina banodimbwa muna Kristo muKolose.

Chipiwo nolunyalalo lwaMwali Tate bedu ngalube kunamwi.

3 Unshaji wose toboka Mwali, Tate baTezi wedu Jesu Kristo, patinomunamatila, 4 nokuti takawha kudimbwa kwenu munaKristo Jesu akale noludo lwamunanalo kubachena bose, 5 pezhulu polubimbo lwamunolondotelwa kudenga. Yezwi mwakazwiwha kale muwhi lyechokomende, indebo imbuya 6 yakezha kwamuli. Sezwimutikana mupasi lyose, indebo imbuya ikumuzwala unchelo akale imukubuka, pakati penu kuva nezhuba limwakawha akale mukawhisisa chipiwo chaMwali muchokomende chose, 7 sezwa mwakalayijwa naEpafulasi unshingikwaina unodikana. Iye unshingi ulobimbika munaKristo akamilila isu, 8 akale wakata kuti kuzibikane kwatili ludo lwenu muMpepo.

9 Nechisoko yechi, kuva izhuba litakazwiwha yezwi, isu atijakalekeja kumunamatila, tikumbila kuti Mwali emuzhaje noluzibo lwechido chiche, kundila mubuchenjevu bose boMpepo nokuwhisisa, 10 kuti mulalame bupenyu bunokwelela Tezi, buzhele kushantisa iye, buzwala unchelo mumishingo mibuya akale nokupamijika muluzibo lwaMwali. 11 Musimiswe namasimba ose, nokuda kokungaima kukulugulu, kunabo bose balo simatila akale nomwoyo ndefu, unalushanto 12 mupakuboka kunaTate, bakata kuti tikwelele kuwana unkobelo mufuma yabachena mulumuniko. 13 Iye wakatichija mubutongo bwenhilima akale akatisenga kubushe boMwananhulumyana uwe unodikana, 14 muna Iye tina lumunulo nokulekejelwa koluchinyo.

15 Kristo untojaniso waMwali usinoboneka, imbano yezwi bumbwa zwose, 16 nezwo muna iye zwinhu zwose zwakabumbwa, kudenga akale nopenyika, zwinoboneka nezwisinoboneka, zwigalo kana buchinda kana isimba zwose zwinhu zwakabumbwa pezhulu pape akale zwibumbilwa iye. 17 Upombeli pezwinhu zwose akale munaiye zwinhu zwose zwilobhatana pamwempela. 18 Iye ndiye unsholo wombili, igubungano, ndiye matangisilo, imbano kuva kubafi, kuti munaizwo zwose ndiye angaba umbuya. 19 Nokuti munaiye kose kuzhala kwaMwali kwakashantilwa kugala mwaali, 20 akale pezhulu pape wakakamujanisa zwinhu zwose naiye, zwopenyika kana zwokudenga, ebuza lunyalalo nelopa lyakakutuka panchinjikwa uwe.

21 Akale namwi, baka bakapambuka muli kule naye noumwe unshaji mulinolunyetelo mundangalilo jenu muta zwito zwibi, 22 koga ngweno iye wakamukamujanisa mumbili uwe nolufu lulwe, kutila kuti emupile imwi muli bachena akale musina chibi kana undandu mbeli kukwe, 23 chete mungogala mukudimbwa, mwakajikama akale mukasungwala musinobhuda mulubimbo lwendebo imbuya imwakawha, yakapupulwa kuchibumbwa chose pasi pedenga, akale chili icho chakatisa kuti imi, Paulu ndibe unshingili.

24 Ngweno ndoshanta mukujiila kwangu, pezhulu penu, akale mumbili wangu ndizhajikija zwikumushomopala mukuyabiswa kwaKristo mumbili uwe, lili igubungano, 25 zwakata kuti ndibe unshingili, sokuda konshingo wandakapilwa imwi, kuti iwhi lyaMwali lizibikane zwizhele, 26 isiswa lyakasisika kwamakole namakole akale nokwe zwizekululu zwinji koga ngweno zwatondejelwa kubachena babe. 27 Kwabali Mwali wakashala kuzibisa Bokuzhe bukulwana bwefuma yolukujo bwesiswa yeyi, eli Kristo munamwi, lubimbo lolukujo. 28 Iye watinopupula, tichenjeja unhu ose akale tilayija unhu ose buchenjevu bose, kuti tipile unhu ose ekakubuka munaKristo. 29 Nezwo ndizwo ndishingilila, ndifundumala nesimba lilye, lindinyungumula.