1 Matezi, bhatani balanda benu zwibuyanana akale zwilolulama, muzibe kuti namwibo muna naTezi kudenga.

2 Ndilani mbeli mwakabhatilila mukunamata, mukuchenjela nokuboka, 3 akale mutinamatilebo, kuti Mwali etizhulile unkoba wewhi, kuti tizibise isiswa yaKristo, ili iyo yakandingwinisa muntolongo, 4 kuti ndizwite zwibe pachena, sezwandinokwelela.

5 Untilo wenu kuna basinodimbwa ube wobuchenjevu, mushingise chibaka zwibuyanana. 6 Indebo yenu ibe imbuya ili noludo unshaji wose, kutila kuti muzibe kushandula unhu wose.

7 Unkwaina wedu unodikana Tayikikasi, unshingi ulobimbika akale eli nshingikwaina munaTezi, unoomubuja zwose pezhulu pangu. 8 Ndimuuntuma kwamuli nechinangwa chakalechi, kuti muzibe kuti tili chini nokuti emusungwaje mumyoyo yenu, 9 akale unanaOnesimasi mwanakwaina ulobimbika akale unodikana, eli umwe wenu. Banomubuja zwose zwakatikana yokuno.

10 Alisitakasi unsungwakwaina umumumusa, akale naMako amaji baBhanabhasi (iye wamwawana indayilo naye kuti kana angozha kwamuli muuntambule), 11 akale Jesu unowhi Jusitasi nayiye ukumumusa. Yaba ndibo chete banhulume bechiJuda mukati mwabashingikwaina bandakashinga nabo mubushe bwaMwali, akale bendinyalaja.

12 Epafulasi, iye eli umwe wenu, unshingi waKristo Jesu ukumumusa, emukumbulukwa unshaji wose nokusungwala muminamato iye, kuti mume mukukubuka akale mwakasimiswa zwizhele muchido chaMwali. 13 Ndopa busumikiji kuti wakashinga nesimba eshingila imwi nabokuLaodesiya nabokuHayilapolisi. 14 Luka undapi unodikanwa naDemasi bakumumusa.

15 Mundimusile banakwaina bokuLaodesiya, naNimfa akale negubungano limomungumba iye. 16 Lukwalo yolu lungobalwa kwamuli, mubone kuti lwabalwa bo kugubungano lyokuLaodesiya, namwibo bo mubale lukwalo lunova kuLaodesiya. 17 Akale muti kunaAkipasi, "Ubone kuti wazhajikija unshingo uwakatambula munaTezi."

18 Imi, Paulu, ndimukwala kulezwa yoku noluboko lwangu. Mukumbulukwe maketani angu.

Chipiwo chibe kwamuli.