1 Mushule mwamakole igumi namana ndakenda kuJelusalema ndili naBhanabhasi naTayitasi. 2 Ndakenda nokuda kwechitondejelo, akale ndikabhaunula indebo imbuya yandakabe ndibhaunula kuna Bokuzhe, ndishangana zwilosisikana nabatungamilili balokosha. Ndaludisisa kasa kuba nechokomende kuti ndikumulabukila zwipo akale kuti ndakalabukila zwipo. 3 Koga kana iye Tayitasi wakabeli nami, aajakamanikijwa kumhalajwa kojoba wakabeli unGiliki. 4 Koga yeyi nyaya yokumhalajwa yakamuswa nabanakwaina bamaniepwa bakangwiniswa zwilosisika, bakezha kofukula kusupuka kwedu kwatina nako munaKristo Jesu, kutila kuti betibuze mubuzike, 5 koga atijakazwibiga pasi pabo kana konshaji, kuti ilebeswa lyeNdebo iMbuya lilondotelwe imwi.

6 Yabo baluba nezwigalo zwopezhulu zwinolemekejwa, kana ini zwabaluba apana zwazwinoleba kwandili, Mwali atotondeja lushalulo, yabo balulemekejwa apana zwibakapamija pandili. 7 Koga, pabakabona kuti ndakapiwa unshingo weNdebo iMbuya kunaabo basakamhalajwa, saPita mwaaluba kuna bakamhalajwa. 8 Nokuti iye wakashinga munaPita sompositoli kuna bakamhalajwa, wakabeshinga nokunami sompositoli kuna Bokuzhe. 9 Akale pabakabona chipiwo chandakapiwa, Jemusi, naKefasi naJoni yabo bakabeli madabiko alokosha, bakatitambula nenzila yokukamujana, imi naBhanabhasi, kuti tinde kunaBokuzhe asi ibo benda kuna balomhalajwa. 10 Zwabakakumbila ndizwokuti tindilembeli tikumbuluka banoyabula, ndicho chinhu chandaludisisisa kuta.

11 Yopo *Kefasi paakezha kuAntiyoki, ndakanyenyejana naye tikalingana nokuti wakama elinondandu. 12 Nokuti bamwe banhu besanu bava kunaJemusi, walusolya naBokuzhe. Koga pabakaswika wakatanga kubwilila mushule akale akazwipambula kwabali, nokutya igapo lyabalomhalajwa. 13 Akale bose baJuda bakatobela kusobimbika kukwe, zwakatisa kuti Bhanabhasi naiye etobele kusobimbika kwabo. 14 Koga pandakabona kuti abajakabakama pechokomende cheNdebo iMbuya, ndakati kunaKefasi mbeli kwabo bose, "kana iwi, kojoba uli unJuda ulalama sowoKuzhe akale sousi unJuda, ungabhata nesimba chini kuti Bokuzhe betobele ungalilo wabaJuda?"

15 Isu nokwedu, tibaJuda nokuzwalwa akale "bachinyi Bokuzhe", 16 tiziba kuti unhu aatolulamiswa nemishingo yomulawo, koga nokudimbwa munaJesu Kristo, nezwo nasubo, takadimbwa munaKristo Jesu, kuti tilulamiswe nokudimbwa munaKristo, akale kusi mishingo yomulawo, nokuti nemishingo yomulawo apana uchalulamiswa. 17 Koga kana mukushaka kwedu kululamiswa munaKristo, isu nokwedu takawanikwa tili bachinyi, Kristo waba umililili wabachinyi na? Pe azwitoba alo! 18 Kana ndikabaka bupya akale yezwiya zwandakakolomola, nezwo ndinoba ndili umbipisi. 19 Nezwo imi pezhulu pomulawu ndakafa kumulawo, kuti ndilalame kunaMwali. 20 Ndakakahamilwa naKristo, akuchili imi ndikumulalama, koga Kristo unolalama mwandili, akale bupenyu bwandinolalama ngweno mumbili, ndinolalama nokudimbwa muMwananhulumyana waMwali, iye wakandida akazwipila pezhulu pangu. 21 Anditolamba chipiwo chaMwali, nokuti ngana kululamiswa kwakaba kuwanikwa nomulawo, nokudalo Kristo waluba akafila zwisipo.