1 Zwandinoleba ndizwezwi, kana undyifuma echi mwana aajilosiyana nondanda pe, kojoba eli mweni wefuma. 2 Koga unoba eli pasi pabalondoti nababhati kujine kuswike unshaji wakatalwa natate. 3 Nenzila inokwelana nasubo patakaba tili bana, takabeli balanda tili pasi pemipepo yenyika. 4 Koga unshaji pawakaswika, Mwali wakatuma Mwananhulumyana uwe, wakazwalwa nonhukaji, wakazwalilwa pasi pomulawu, 5 kuti echije yabaya bakaba beli pasi pomulawu kuti titambulwe sabana.

6 Nokuti mubana, Mwali wakatumila mumyoyo yedu uMpepo woMwananhulumyana uwe, unoshomeja uti, "*Abha! Tate." 7 MunaMwali auchi undanda, koga mwana, nezwo nokuti umwana, undyifuma.

8 Pemishaji yakapela, musanu mwaziba Mwali, mwakaba mulibazike kuzwibumbwa zwisi zwimwali, 9 koga feno sobumwabaziba Mwali, kana kuti mwazibwa naMwali, mungabwilila chini akale kumipepo yobutela neyokujiila, yamunoda kuba balanda bayo akale? 10 Munolondota mazhuba, nemyeji, nemyaka namakole! 11 Ndikumutya kuti ndakamushingila nesimba zwisipo.

12 Banakwaina, ndikumumubweta kuti mube sami, nokuti imi ndakaba samwi. Amuna chinhu chamwakandichinyila pe, 13 Moziba kuti chakata kuti ndimubhaunulile iNdebo iMbuya panshaji wokutanga, ndichokuti ndakaba ndilwala. 14 Koga amujakandishasha kana kundishunda kojoba bulwaji bwangu bwakaba buli chikwejo kwamuli, koga mwakanditambula sengilozi yaMwali kana kuti saKristo Jesu. 15 Kugunchikana kwamwakabewha kwakenda kupi biya? Nokuti ndinomupupulila, kana zwakabetubulika, mwalubhisa mesho enu mundipa. 16 Ani biya ndaba umbengi wenu na, nokumubuja ichokomende?

17 Yabo banhu banota soti banoda kumubhancha, belinechinangwa chisi chibhodo, chinhu chabanobabalila ndichokuda kumubhisa kwatili, kuti mute zwabanoda. 18 Zwibuya kusungwala, kana chinangwa chili chibuya, nokugala zwitiwa alo, kusibe chete kana ndili namwi. 19 Bana bangu batukutuku, imwi bandinowhila kulwaja sokwemimba, kuswikila Kristo abumbwa munamwi! 20 Ndajoda kuti saali ndili namwi feno kutila kuti ndishandule inzila yokulebeleka kwangu, nokuti andichinoziba kuti ini chandingate namwi.

21 Ndibujeni imwi munoda kuba pasi po mulawo, amuwhile zwimulebwa nomulawo na? 22 Nokuti kulokwalwa kuti Abhulahamu wakabeli nabana banhulumyana babili, umwe wondandakaji nomwe wonhukaji ulosungunuka. 23 Mwananhulumyana wondandakaji wakazwalwa kwombili, koga wonhukaji wosungunuko wakazwalwa nechibimbiso. 24 Yoyu unkwejaniso, wabanhukaji yaba babili zwivumilano zwibili, umwe unova kudunhu lyeSinai, ezwala bana bachooba balanda, ndiHaga. 25 Ngweno Haga ulomilila idunhu lyeSinai muAlabhiya, unokwendelana neJelusalema lyangweno, nokuti umo mubulanda nabana babe. 26 Koga iJelusalema lipopezhulu lilosungunuka, ndibo amai bedu. 27 Nokuti kunokwalwa kuwhi,

"Shanta, iwi mhanje usinozwala,

pululuja ushomeje, iwi usakawha kulwaja kwemimba,

nokuti bana bonhukaji yondiya wakalambwa banji,

kupinda bana bonhukaji ulolobolwa."

28 Ngweno imwi, banakwaina, saIsaki, mubana bechibimbiso. 29 Nonshaji yondiya, iye wakazwalwa nokwombili wakashetesa wakazwalwa nokoMpepo sezwazwili ngweno. 30 Koga iwhalo inotini? Inoti "Tatamila undandakaji nomwananhulumyana uwe, nokuti mwananhulumyana wondandakaji aatolya ifuma panu pamwempela nomwananhulumyana wonhukaji wakasungunuka." 31 Nezwo, banakwaina, atitoba bana bondandakaji koga bonhukaji ulosungunuka.