1 Me, o Pavle, o apostoli e Isuse Hristoskoro pali zapoved e Devleskiri, amare Spasiteleskiri hem e Isuse Hristeskiri soj amari nada, 2 pišinava e Timotejeske, me čačutne čhaveske ki vera:

Blagodat, milost hem mir e Devlestar o Dad hem e Isuse Hristostar, amare Gospodarestar.

3 Angleder te džav ki Makedonija, rodingjum tutar te ačhove ko Efes, te šaj te naredine nesave manušenge te na sikaven hovavno učibe 4 hem te čhinaven te verujnen ko hovavne prikazne hem ko but spisakija taro parapapija. Sa adava anela poviše akošibe, nego te džal angle e Devleskoro delo, soj tano preku vera. 5 A i cel akale naredbakiri tani o mangipe, savo so avela taro čisto srce, šukar sovest hem tari čačutni vera. 6 Nesave lendar cidisalile akalestar hem irange pe ko čuče lafija. 7 Ola mangena te oven učitejla e Zakoneskere, a doborom tvrdinena so na džanena bašo so kerena lafi.

8 Džanaja deka o Zakoni tano šukar, ako nekoj ikerela le sar so trebela. 9 Isto agjar džanaja deka o Zakoni nane dendo e pravednikonge, nego bašo okola so na ikerena:

okola soj tane protiv o Devel,

bašo okola so nane lende o Devel hem bašo grešnikija,

bašo okola soj nane sveta hem bašo okola soj bizo Devel,

bašo okola so mudarena dži pe daden hem pe dajen,

bašo okola so mudarena e manušen,

10 bašo bludnikija,

bašo murša so sovena muršencar,

bašo okola so bikinena e robon,

bašo okola so hovavena,

bašo okola so hovavne hana sovli hem sa javer soj protiv bašo sasto učibe.

11 Akava učibe tano prema o slavno evangelije amare blagoslovime Devlestar soj tano mange doverimo.

12 Blagodarinava man e Isuse Hristoske, amare Gospodareske, so dengja man sila, so sine le doverba ki mande hem čhigja man ki akaja služba, 13 iako angleder hulinava sine e Devle, progoninava sine leskere sledbenikon hem sijum sine siladžija. Ama o Devel sikavgja mange milost, soske adava kerava sine bizo te džanav, sar neverniko. 14 Ama i blagodat amare Gospodareskiri sine but sikavdi upra mande, zaedno e veraja hem e mangipaja soj tane ko Isus Hristos.

15 Akje jekh čačutno lafi so zaslužinela te ovel prifatimo: O Isus Hristos alo ko sveto te spasinel e grešnikon, so maškar lende me sijum najbaro. 16 Ama, adaleske sikavgja mange milost, e najbare grešnikoske, te šaj upro mande o Isus Hristos te sikavel pi bari trpelivost, sar primer okolenge so ka verujnen ki leste hem ka dobinen večno životo. 17 A e večno Caroske, e jekhe Devleske, so našti te preperel hem so na dikhola, čest hem slava ko sa o vekija. Amin.

18 Timotej, mo čhavo, dava tut akaja zapoved spored o proroštvija so angleder sine tuke vakerde te šaj setineja tut ki lende hem te borine tut šukar ki borba, 19 ikerindor ti vera hem o šukar sovest. Nesave frdinge akava, hem uništinge pi vera. 20 Maškar lende tane o Imenej hem o Aleksandar, so predajngjum len e Bengeske te oven sikavde te na hulinen.