1 Akje jekh čačutno lafi: ako nekoj mangela te ovel starešina, mangela šukar služba. 2 A o starešina mora te ovel le šukar ponašaj, te ovel rom jekhe romnakoro, te džanel te kontrolirinel pe, te ovel gogjaver, poštojmo, gostoprimlivo, hem sposobno te sikavel, 3 te na ovel pijandžija, ni siladžija, nego te ovel krotko, ni kavgadžija, ni bokhalo parenge. 4 Ov mora šukar te vodinel po kher hem te oven le čhave so šunena le hem so but poštojnena le. 5 Ama, ako na džangja te vodinel po kher, sar ka sekirinel pe e Devleskere crkvake? 6 O starešina na trebela te ovel nevo ki vera, te na vazdel pe hem te perel ki isto osuda sar o Beng. 7 Isto agjar ov mora te ovel manuš soj tano poštojmo taro sa o narodo soj avrijal tari crkva, te šaj te na ovel ladžardo hem te na perel ki zamka e Bengeskiri.

8 Isto agjar o gjakojna mora te oven cenime, te na oven dujmujale, te na pijen but mol hem te na džan palo nepošteno barvalipe. 9 Ola mora te ikeren pe hor ko čačipe e verakoro hem ko čisto sovest. 10 O gjakojna najanglal mora te oven proverime, hem ako nane ništo protiv lende, neka služinen sar gjakojna. 11 Isto agjar, lengere romnja mora te oven cenime, te na keren špijolnukija, te džanen te kontrolirinen pe hem te oven verna ko sa.

12 O gjakoni mora te ovel rom jekhe romnakoro, hem šukar te vodinel pe čhaven hem po kher. 13 Soske okola so šukar služinena sar gjakojna, ovena poštojme maškar o narodo hem šaj bizi dar te vakeren tari pumari vera ko Isus Hristos.

14 Iako nadinava man deka panda hari ka avav ki tute, pišinava tuke akava, 15 ako zadržingjum man, te šaj te džane sar trebela te ponašinel pe nekoj e Devleske ko kher, koja tani i crkva e dživde Devleskiri, stubo hem temeli e čačipaskoro.

16 Bizo sumna, bari tani i tajna tari pobožnost:

Ov sikavgja pe ko telo

sine opravdimo taro Duho,

sine dikhlo taro angejla,

sine propovedimo maškar o sa o nacije,

ki leste o manuša verujnge

hem sine voznesimo ki slava.