1 Me, o Jovan o starešina, pišinava me mangle Gajeske, so mangava le ko čačipe.

2 Mangleja amala, molinava man te ove šukar ko sa hem te ove sasto, sar soj ti duša šukar. 3 Sine mange bari radost koga ale nesave phrajla hem svedočinge tari ti vernost e čačipaskiri, vakerindor sar džaja palo čačipe. 4 Nane pobari radost taro adava te šunav deka me čhave živinena ko čačipe.

5 Mangleja amala, tu sijan verno ko adava so kereja le e phralenge, iako ola tane jabandžije. 6 Ola vakerge e crkvake bašo to mangipe. Šukar ka kere ako spremingjan len bašo drumo agjar sar so trebela anglo Devel. 7 Adaleske so ola bašo o anav e Hristoskoro iklile te džan ko drumo hem na lena nisavi pomoš e manušendar so na džanena e Devle. 8 Adaleske, amen sijem dužna te sikava gostoprimstvo asavke manušenge, te šaj zaedno te kera buti bašo čačipe.

9 Pišingjum e crkvake, ama o Diotref, so mangela te ovel prvo, na mangela te priminel amen. 10 Adaleske, koga ka avav ka podsetinav le sa adava so kerela, hem so širinela amendar lošna lafija. Hem adava nane leske dovolno, panda upral na priminela e phralen, ni na mukhela okolen so mangena adava te keren hem brkinela len tari crkva.

11 Mangleja amala, ma dikh tut upro lošnipe, nego upro šukaripe. Sekoj so kerela šukaripe taro Devel tano, a sekoj so kerela lošnipe, ov na dikhla e Devle. 12 Bašo Dimitrija sarine vakerena o najšukar, hem korkori o čačipe vakerela lestar hem amen da vakeraja šukar lestar. A tu džaneja deka adava so amen vakeraja tano čačipe.

13 Isi man but te pišinav tuke, ama na mangava te pišinav penkaloja hem percoja, 14 nego nadinava man deka but sigate ka dikhav tut hem ka kera lafi muj mujeja.

15 Mir tuja.

Pozdravinena tut o amala. Hem pozdravin e amalen adathe ko anav.