1 Pišinava me o Pavle, so sijum ko zatvor bašo Isus Hristos, hem o phral o Timotej dži ko amaro manglo amal hem sorabotniko o Filimon, 2 hem amare phenjake e Apfijake, hem e Arhipeske, soj amaro borco bašo Hristos, hem celo crkvake, so khedela pe ko kher e Filimoneske:

3 Blagodat hem mir tumenge e Devlestar amaro Dad hem e Gospodarestar o Isus Hristos.

4 Sekat blagodarinava man me Devleske, koga spomninava tut ko me molitve Filimon, 5 adaleske so šunava bašo to mangipe prema e Devleskere manuša hem baši ti vera ko Gospodari o Isus. 6 Molinava man bašo amaro zaedništvo so isi amen ki vera te anel tuke te svatine hor taro sekova šukaripe so isi amen ko Hristos. 7 To mangipe but radujngja man hem ohrabringja man, adaleske so tu, phrala, osvežingjan o srcija e Devleskere manušengere.

8 Adaleske, iako ko anav e Hristoskoro isi man pravo te naredinav tuke so te kere, 9 nego taro mangipe najanglal zamolinava tut, asavko so sijum, me o phuro Pavle, akana hem ko zatvor bašo Isus Hristos: 10 molinava tut bašo mo čhavo o Onisim, kaske so ulum duhovno dad dži kote sijum sine ko zatvor. 11 Ov tuke porano na sine korisno, a akana tano korisno* hem tuke hem mange.

12 Bičhavava le palal ki tute – le soj tano mo srce. 13 Manglum te ačhol mancar, te šaj tuke ko than te pomožinel man dži kote sijum phandlo ko lancija bašo o evangelije. 14 Ama na manglum ništo te kerav, bizo tu te soglasine tut, te na dikhol to šukaripe deka tano kerdo zorleja, nego tari ti šukar vojla. 15 Šaj hem adaleske sine hari odvimo tutar, te šaj te ovel tlo sekat, 16 hem na više sar robo, nego poviše taro robo – sar manglo phral. Ov tano mange but manglo, a kozom i poviše tuke, na samo sar paše manuš, nego hem sar phral ko Gospodari.

17 Adaleske, ako man dikheja man sar sorabotniko, primin le sar mange ko than. 18 A ako kergja tuke nešto lošno ili ako dužinela tuke nešto, prefrlin le adava upro mande. 19 Me, o Pavle, pišinava akava me vasteja: ka platinav tuke sa! A te na kerav lafi kozom tu sijan mange dužno bašo to duhovno životo! 20 Oja, mo phral, mangava te ovel man nesavo korist tutar ko Gospodari. Osvežin mo srce ko Hristos. 21 Pišinava tuke akava adaleske so sijum sigurno ki ti poslušnost, soske džanava deka ka kere hem poviše taro adava so rodava.

22 Hem panda akava: spremin mange soba sojbaske, soske nadinava man deka o Devel ka iranel man ki tumende sebepi tumare molitve.

23 Pozdravinela tut o Epafras, soj phandlo mancar ko zatvor bašo o Isus Hristos, 24 hem me sorabotnikija o Marko, o Aristarh, o Dimas hem o Luka.

25 I blagodat e Gospodareskiri e Isuse Hristoskiri neka ovel tumare duhoja.