1 Podsetin e manušen te pokorinen pe e vlasteske hem e vladitelenge, te oven poslušna, hem spremna bašo sekova šukar delo. 2 Vaker lenge nikastar te na vakeren lošnipe, te na oven kavgadžije, nego te oven sekat krotka prema o manuša.

3 Soske amen da nekat sijem sine nesvatliva, neposlušna, hovavde, robija bašo želbe hem zadovolstvo bašo sa. Živinaja sine ko lošnipe hem ljubomora. Mrzinge amen hem amen da mrzingjem amen jekh jekheja. 4 Ama koga amaro Devel, o Spasiteli, sikavgja po šukaripe hem po mangipe, 5 ov spasingja amen, ama na bašo amare šukar dejla so kergjem, nego baši leskiri milost. Ov spasingja amen preku o thojba e neve bijanibaskoro hem obnovingja amen e Sveti Duhoja. 6 O Devel celosno čhorgja upro amende o Sveti Duho preku o Isus Hristos, amaro Spasiteli, 7 te šaj te ova opravdime preku leskiri blagodat, te ova naslednikija nadaja bašo večno životo. 8 Akje jekh čačutno lafi, hem mangava te poftorine akala bukja, agjar okola so verujnena ko Devel te posvetinen pe te keren šukar dejla. Akavaj šukar hem korisno bašo sarine.

9 Ama cide tut taro glupava muabetija hem rodoslovija, taro debate hem akošiba bašo Zakoni, adaleske so nane korist adalestar hem adavaj badijava. 10 Opomenin e manuše so anela deliba jekh puti, opomenin le dujto puti, a palo adava ma te ovel tut ništo leja! 11 Šaj te ove sigurno deka asavko manuš i rumimo hem grešinela. Ov korkori pes osudinela.

12 Koga ka bičhavav tute e Arteme ili e Tihike, trudin tut te ave ki mande ko Nikopol, adaleske so adari mangava te nakhavav o jeven. 13 E Zinaske o advokati hem e Apoloske, ker sa so šaj te pomožine len ko lengoro drumo sa so trebela lenge.

14 Hem amare manuša mora te sikloven te posvetinen pe te keren šukar dejla, kote soj čače potrebno, hem te na živinen bez korisno životo.

15 Pozdravinena tut sarine soj tane akate mancar.

Pozdravin okolen so mangena amen ki vera.

I blagodat neka ovel tumencar.