1 A tu, Tit, mora te sikave okova so soglasinela pe e saste učibaja. 2 Sikav e pophuren te kontrolirinen pe, te oven poštojme, gogjaver, hem saste ki vera, ko mangipe hem ko trpenie.

3 Isto agjar sikav hem e pophure romnen te ponašinen pe sar so ličinela e romnenge soj tane sveta, te na keren špijolnukija hem te na oven zavisnikija tari mol, nego te sikaven adava soj šukar. 4 Togaš ola šaj te sikaven e terne džuvlen te mangen pumare romen hem e čhaven, 5 te kontrolirinen pe, te oven čisto srceja, te oven domakice, te oven ljubezna hem te pokorinen pe pumare romenge – te šaj te na mejlarel pe o lafi e Devleskoro.

6 Agjar hem, ohrabrin e terne muršen te ovel len kontrola. 7 Ko sa de len primer kerindor šukar dejla. Ko to učibe sikav iskrenost hem ozbilnost. 8 To učibe neka ovel sasto, te našti nikoj te vakerel protiv leste, agjar okola so protivinena pe tuke te oven ladžarde, soske nane te ovel len ništo lošno te vakeren baši amenge.

9 Sikav e robon ko sa te pokorinen pe pumare gospodarenge, te ugodinen lenge hem te na iranen lenge lafija, 10 te na čoren lendar, nego te sikaven pe sar manuša kaste šaj te verujnel pe, agjar te šaj o učibe amare Spasiteleskoro, e Devleskoro, ko sa te ovel sikavdo deka i šukar.

11 Adaleske so o Devel sikavgja pi blagodat, koja šaj spasinela sa e manušen. 12 Adaja blagodat sikavela amen te otkažina amen e životostar soj bizo Devel hem e svetoskere želbendar, hem te živina ko akava sveto kontrolirimo, pravedno hem pobožno, 13 adžikerindor dži kote na avela adava blagoslovimo dive koleste so nadinaja amen, koga ka sikavel pe i slava amare bare Devleskiri hem e Spasiteleskiri e Isuse Hristoskiri. 14 Ov dengja korkori pes baši amenge, te otkupinel amen taro sekova lošnipe hem te kerel amen peske čisto narodo so trudinena pe te keren šukar dejla.

15 Akava trebela te sikave. Ohrabrin hem ukorin ko sa o avtoriteti. Ma dozvolin nikoj te dikhel tut po tele!