1 Pišinava me, o Pavle, o sluga e Devleskoro hem o apostoli e Isuse Hristoskoro, so sijum bičhavdo te bajlarav i vera e Devleskere birimengiri hem o pendžariba e čačipaskoro so legarela ki pobožnost. 2 Akaja vera dela nada bašo večno životo, so o Devel, kova nikat na hovavela, vetingja angleder te kerel o sveto. 3 Akana ko pravo vreme, sikavgja po lafi preku o propovediba soj mange doverimo pali naredba e Devleskiri, amare Spasiteleskiri.

4 Pišinava e Titeske, me čačutne čhaveske ki isto vera:

Blagodat hem mir e Devlestar o Dad hem e Isuse Hristostar, amare Spasitelestar.

5 Adaleske mukhlum tut ko Krit te kere adava so nane kerdo dži ko krajo hem ko sekova gradi te čhive starešine, sar so naredingjum tuke. 6 A o starešina mora te ovel manuš kastar so našti ništo lošno te vakerel pe, te ovel rom jekhe romnakoro, hem te ovel le čhave so verujnena hem kastar so našti te vakerel pe deka tane rumime ili neposlušna. 7 Adaleske so o starešina vodinela e Devleskoro kher, ov mora te ovel manuš kastar so našti ništo lošno te vakerel pe, te na ovel manuš so mangela te ovel sa palo leskoro, te na holanel sigate, te na ovel pijandžija, ni siladžija, te na džal palo nepošteno barvalipe, 8 nego ov mora te ovel gostoprimlivo, te mangel o šukaripe, te kontrolirinel pe, te ovel pravedno, sveto hem disciplirimo. 9 Ov mora te ikerel pe stabilno ko čačutno lafi taro amaro učibe, te šaj te ohrabrinel javeren ko sasto učibe hem te uverinel okolen da soj tane protiv.

10 Adaleske so isi but manuša soj tane protiv o sasto učibe, kola vakerena čuče lafija hem avena te hovaven, a posebno okola so ikerena o obrezanje. 11 Lengere muja mora te phanden pe, soske bašo nepošteno barvalipe rasturinena sa e manušengere familijen, sikavindor but bukja so na trebela. 12 Jekh taro lengoro proroko phengja: "O manuša taro Krit sekat hovavena, ola tane diva zverija, mrzale hem bi čale." 13 Adavaj čače phendo. Adaleske, silno ukorin len, te šaj te oven saste ki vera, 14 hem ma te šunen prikazne e Evrejengere hem o naredbe e manušengere so cidena pe taro čačipe.

15 E čistonge sa tano čisto, a e rumimenge hem e nevernikonge ništo nane čisto, nego lengiri da godi hem i sovest rumimi. 16 Ola vakerena deka pendžarena e Devle, ama pumare deloncar dokažinena deka na pendžarena le. Ola tane gadna hem neposlušna, nesposobna bašo bilo savo šukar delo.