1 Dava tut sovli anglo Devel hem anglo Isus Hristos, koj ka sudinel e dživdenge hem e mulenge ko leskoro ajbe hem ko leskoro vladiba sar Caro: 2 propovedin o lafi e Devleskoro, ov spremno ko šukar hem ko lošno vreme, popravin, ukorin hem ohrabrin – sikavindor so baro trpenie. 3 Adaleske so ka avel vreme koga o manuša nane te mangen te šunen o šukar učibe, nego palo pumare želbe, ka kheden maškar peste bute učitelen so vakerena adava soj šukar lengere kanenge, 4 i ka iranen pe kana taro čačipe hem ka iranen pe ko prikazne. 5 Ama tu, ov svesno, izdržin o pharipe, ker i buti sar evangelisti, hem završin ti služba e Devleske.

6 Adaleske so me više ovava žrtva, hem mo vreme i paše te džav taro akava životo.

7 Šukar boringjum man, i trka završingjum, i vera ikergjum. 8 Akana i mange spremimi i kruna tari pravednost, so o Gospodari, o pravedno Sudija, ka del mange ko adava dive hem na samo mange, nego sarine so edvaj adžikerge leskoro ajbe.

9 Dikh so posigate te ave ki mande. 10 Soske o Dimas mukhla man, adaleske so mangla e svetoskere bukja. Ov gelo ko Solun, o Kriskent ki Galatija, a o Tit ki Dalmacija. 11 Samo o Luka i mancar. Le e Marko hem ana le tuja, soske ov i mange potrebno ki mi služba. 12 A e Tihike bičhalgjum ko Efes. 13 Koga ka ave, ana mange i nametka so mukhlum la ko Karp ki Troada, hem o lila, a osobeno o lila soj kerde tari koža.

14 O kovači o Aleksandar kergja mange but lošnipe. O Gospodari sa ka iranel leske spored leskere dejla. 15 A tu arakh tut lestar, adaleske so but protivingja pe amare lafenge.

16 Ki mi prvo odbrana anglo sudo, nikoj na sine uza mande, nego sarine mukhle man. Te na pišinel lenge o Devel sar grevo. 17 Ama o Gospodari sine uza mande hem dengja man sila te šaj preku mande celosno te vakerel pe o evangelije, hem te šunen sa o nacije so na džanena e Devle. Hem sijum sine ikavdo taro muj e laveskoro. 18 O Gospodari ka ikalel man taro sekova lošnipe hem ka legarel man sasto vesto ko po nebesno carstvo. Leske slava ko sa o vekija. Amin.

19 Pozdravin e Priskila hem e Akila hem e Onisiforeskere kherutnen.

20 O Erast ačhilo ko Korint, a e Trofime mukhlum le ko Milit, adaleske so sine nasvalo. 21 Dikh te ave akate angleder o jeven.

Pozdravinela tut o Evul, o Pud, o Lin i Klavdija hem sa o phrajla hem o phenja.

22 O Gospodari neka ovel te duhoja.

Blagodat neka ovel tumencar.