1 Ama te džane hem akava: ko posledna dive ka oven but phare vremija. 2 Adaleske so, o manuša ka dikhen samo pes, ka mangen but o barvalipe, ka falinen pe, ka vazden pe ko baro, ka hulinen, ka oven neposlušna pumare dadenge hem dajenge, ka oven neblagodarna hem bidevleskere, 3 bizo mangipe, bizo oprost, ka keren špijolnukija, nane te ovel len kontrola, ka oven siladžije hem ka mrzinen o šukaripe, 4 ka oven predavnikija, bizo te razmislinen ka keren problemi, ka ikeren pe ko baro hem poviše ka mangen te keren pumare želbe nego so ka mangen e Devle, 5 ka gluminen deka tane devleskere manuša, ama ka otkažinen pe leskere silatar. Cide tut asavkjendar.

6 Maškar lende tane okola so arakhena sar te khuven ko khera hem te len i kontrola upro džuvla so lokheste verujnena ko sa, soj pherde grevoncar hem vodime taro but lošna želbe. 7 Ola stalno siklovena, ama nikat našti te pendžaren o čačipe. 8 Sar so o Janij hem o Jamvrij protivingja pe e Mojsijaske, agjar hem akala manuša protivinena pe e čačipaske. Asavke manušen isi len rumimi godi hem lengiri vera nane dokažimi. 9 Ama ola nane te resen but dur, soske lengoro dilinipe sarinen ka dikhen, sar so dikhla pe o dilinipe e Janijeskoro hem e Jamvrijeskoro.

10 A tu Timotej sledineja mo učibe, živibe, mi cel, mi vera, mo mangipe, mo trpenie, 11 me progonstvija hem cidibe. Džaneja savo pharipe sine man ki Antiohija, ki Ikonija hem ki Listra. Sa o progonstvija nakhagjum, ama o Gospodari taro sa akava spasingja man. 12 Hem čače sarinen so mangena te živinen pobožno životo ko Isus Hristos, ka oven progonime. 13 A o lošna hem o hovavne manuša ka oven sa pološna agjar so ka hovaven javeren hem ola da ka oven hovavde. 14 Ama tu iker tut ko adava so siklilan hem ko so verujngjan, soske džaneja kastar siklilan. 15 Adaleske so taro tiknipe džaneja o Sveta Lila, kova šaj kerena tut mudro bašo spasenije preku i vera ko Isus Hristos. 16 Celo Sveto Lil taro Devel tano vdahnimo* hem i korisno bašo učibe, bašo opomenibe, bašo poprajbe hem bašo siklojbe ki pravednost, 17 te šaj e Devleskoro manuš te ovel celosno spremno bašo sekova jekh šukar delo.