1 Me, o Pavle, o apostoli e Isuse Hristoskoro pali vojla e Devleskiri, bičhavdo sijum te vakerav taro vetimo životo soj tano ko Isus Hristos.

2 Pišinava e Timotejeske, me mangle čhaveske:

Blagodat, milost hem mir e Devlestar o Dad hem e Isuse Hristostar, amare Gospodarestar.

3 Blagodarinava man e Devleske, kaske so služinava ki čisto sovest, sar so služinge leske me parapapija, dive rat spomninava tut ko me molitve. 4 Koga setinava man te asvende, mangava te dikhav tut hem te phergjovav so radost. 5 Setinava man te čačutne verate, so najanglal sine ki ti baba i Loida hem ki ti daj i Evnika, a sigurno sijum deka adaja vera akana živinela hem ki tute. 6 Adaleske podsetinava tut te bajlare i jag e Devleskere daroskiri soj dendi tuke koga čhigjum me vasta upro tute. 7 Adaleske so o Duho so dengja amen o Devel na kerela amen te dara, nego dela amen sila, mangipe hem disciplina.

8 Adaleske ma ladža te svedočine amare Gospodarestar. Ma ladža ni mandar, so sijum sine phandlo baši leske, nego preku i sila e Devleskiri ov mancar ko pharipe bašo evangelije. 9 Ov spasingja amen hem vikingja amen te živina ko sveto životo, na baši amare dejla, nego baši leskiri cel hem baši leskiri blagodat, soj amenge dendi ko Isus Hristos, panda taro početok e svetoskoro. 10 Ama akana sikavgja amenge koga alo amaro Spasiteli o Isus Hristos, so uništingja o meriba hem angja o večno životo ki svetlina preku o evangelije, 11 bašo akava sijum čhivdo sar propovedniko, apostoli hem učiteli. 12 Adaleske trpinava sa akava, ama na ladžava, soske džanava kaste verujngjum hem sigurno sijum deka ov tano silno te arakhel adava so mange dengja dži ko adava dive koga ka avel.

13 Iker le sar primer akava sasto učibe, so šungjan le mandar, veraja hem mangipaja ko Isus Hristos. 14 Arakh o šukar evangelije soj tuke doverimo – arakh le preku o Sveti Duh so živinela amende.

15 Džaneja deka sarinen soj tane tari Tikni Azija mukhle man, maškar lende tane hem o Figel hem o Ermogen.

16 O Gospodari neka sikavel milost ko kher e Onisiforeskoro, soske but puti ohrabringja man hem na ladžandilo so sijum ko zatvor, 17 nego, koga sine ko Rim, but rodela man sine sa dži kote na arakhla man. 18 O Gospodari neka del le milost ko sudno dive. A tu but šukar džaneja kozom ov pomožingja man ko Efes.