1 Nenga na mpi'ndo wa kanisa, nikuandikya wenga wa Gayo, wambwiga lyangu' wanikupendile muno.

2 Wampendwa wangu', nilu'ba uyaliwe mumakowe goti na ube wankoti kati loo yako mwaiyaliwa. 3 Naatipulaika muno bi'ngi' ba alongo pabaaisile na kutuyaulya bu'kana no u'bi'li'ka kwako muukakape na mu'lu' mwoyendelya tama muukakape wo. 4 Ntu'pu' pulaa yaibile ngu'lu' pi'ta yi'no, yo yu'wa panga bana bangu' balo kabayendelya tama muukweli.

5 Mpendwa wangu', wenga wamwu'bi'li'ka kwa galu' gawaapangya aumini, pamope no panga bembe ageni. 6 Aumini bo baalikong'ondeli kanisa lya pano abali ya upendo wako. Tukulu'ba uyendeli kwayangatia mumwanja wabe kwa ndi'la yainnogelelya Nnu'ngu'. 7 Kwa mwanjaa baayabwi mwanja wabe wa kuntumikia Kilisitu pangali pokya kili'be sosoti bu'ka kwa bandu bangau'bi'lya. 8 Kwa nyo, twenga tupalikwa kwayangatia bandu ba, li'nga tupate panga kasi pamope kwa ndi'la ya kweli.

9 Naandike balua nyipi kwa kanisa lyo, lakini Diotrefe ywapenda ba kolongosi wabe, akani kutuyu'wa. 10 Kwa nyo panaalu'a isa kwo, naalu'a kugaumukwa makowe goti gapanga, na ubu'su' waupiya bu'kana na twenga kwa makowe malau. Kai' ago baili, ila ywembe mwene aakemyali aumini bo, na ata balu' babapala kwakemya, endakwakanikia na kwabi'nga mukanisa.

11 Wampendwa wangu', kaneuyige lyalibile lyakau, ila uyige linogau. Ywembe ywapanga manogau ywa Nnu'ngu', lakini ywapanga maakau, antangiteli Nnu'ngu'.

12 Kila mundu agalumba manogau bu'kana na Demetrio, na maisa gake galandana na kweli. Na twenga kai' twendakong'ondelya manogau bu'kana na ywembe, na wenga utangite panga satulongela sa kakape.

13 Nibile nago gambone ga kukuandikya, lakini nipendili kugaandika kwa bwino. 14 Lakini nipi'kanilya kukutyangilya masu'ba gaganogano ga papipi, na twenga twalu'a longela katulolana.

15 Amani ibe pamope na we. Mambwigalyo bababile pano bendakusalimia. Waasalimie mambwiga bitu bababile kwo, kila mundu kwa lina lyake.