1 Nenga na Yuda, nantumisi wa Yesu Kilisitu, na nnongowe Yakobi, nimwandikyanga mwenga mwamukemilwe na Tati' Nnu'ngu' na mwamutama muupendo wake no li'ndi'li'lwa kwa kitumbu sa Yesu Kilisitu.

2 Ninnu'bya kiya, amani na upendo wambone ube kwinu.

3 Mwamambwiga bangu', niminyikiage muno kumwandikyanga bu'kana na ukosopoli watupanga nawo kiselele twenga twaboti. Lakini nibweni panga nipalikwa kumwandikya balua yi'no, li'nga kunnu'ba panga mukasane kwili'ndi'la imani yi'lu' Nnu'ngu' yaapei apeleteu bake mala yimo bai kwa nsimu woti. 4 Kwa mwanjaa kubile na bandu babaiyingiye kwa iyo pakati yinu, bandu babaandikilwe ukumu yi'no bu'ka tokyaa, alau babagalambwa ngu'ngu' ya Nnu'ngu' kwa kwipeya uulu wo panga malau, kabankana ywembe ywabile kolongosi na Bwana witu wa kisake, Yesu Kilisitu.

5 Pamope no panga muyomwike tanga makowe aga goti, nipala ninku'mbu'ki'ye panga Bwana aakosopoli bandu bake bu'ka kunni'ma wa Misili, lakini bu'ka po, aalangamise balu' babaakotwike kumwu'bi'lya. 6 Kai' mukumbuki malaika babaakotwike yi'mi'li'ka utawala wabe, na kwileka itamo yabe. Nnu'ngu' aatabi mulubi'ndu' kwa minyololo yaikangamile. Akwo bali'nda lisu'ba li'lu' lyo ukumilwa. 7 Nyinyonyo Sodoma na Gomola na mili'ma yi'lu' ya mbwega yake, bandu bo baapangite kati balu' malaika, baaipulaise kwa upege no bi'ngi'ya maminyikiyo mbali'mbali' ga yi'ga, ngabapeyelwa ukumu ya mwoto wa milele, ibe likwi'li'ko kwa bandu bi'ngi'.

8 Nyinyonyo na balimu bo ba ubu'su', balongoyelwa na maloto gabe kwisapuya yi'ga yabe bene kwa sambi. Baikana amuli ya utawala wowoti na kwatukana malaika apeleteu bababile kunani. 9 Ata Mikaeli malaika nku'lu' aapangiteli nyo. Mumataukano gake na Ibilisi bu'kana na yi'ga ya Musa, Mikaeli aalowiteli kupulu kwa kumukumu Ibilisi, ila aabaite, "Nnu'ngu' mwene na akukalipi!" 10 Lakini bandu ba bagatukana makowe gangali kugatanga. Na kwa galu' makowe gabagatanga, bagatanga kwa uyu'yu'u nga kati inyama yangali malango, ago nga gagaalangamisa. 11 Baakibona, kwa mwanjaa babi'ngiye ndi'la ya Kaini. Kwa kitumbu so pata mali, batu'mbwike mulikosa lyaapangite Balaamu. Balangamiswe kwa kitumbu sa ulau kati Kora mwaapangite ulau. 12 Ika kwabe kuleta atali yaiiyilwe mumakalamu ginu ga upendo. Baili'lya bene bai pangali kwibona oni. Bembe nga kati maunde gagaku'ngu'lu'ka na nsunga pangali leta ula, nga kati mikongo yangali pambika itunda ata ikatei nsimu wa mauno, nga mikongo yaiyokolilwe no waa mpamo. 13 Bandu bo nga kati mabi'mbi' makali' ga baali, na iyendo yabe ya oni ibile kati matutume ga mabi'mbi' go. Bembe nga kati ndondwa yaityangatyanga kunani, Nnu'ngu' aabi'ki pandu pene lubi'ndu' lwa totolo batame mo milele.

14 Na Enoki, mundu ywa saba bu'ka mulubelekwo lwa Adamu, aatilondwa bu'kana na bandu bo kabaya, "Lingulya, Bwana endaisa pamope na maelupu kwa maelupu ga malaika bake apeleteu, 15 li'nga kwaukumu bandu boti na kwapwatya babapanga sambi boti kwa iyendo yabe ndau, pamope na milongelo milau yoti yabaalongei bu'kana na Nnu'ngu'."

16 Bandu ba saa yoti bendaku'ku'li'ka muno, no pala makosa ga bandu bi'ngi', bembe bakota maminyikio gabe manyatau na kwilumba muno, no longela makowe ga kwapulaisa bandu kwa kitumbu sa pwaila yabe bene.

17 Lakini muku'mbu'ki galu' gamubakiyilwe kwai'mbu' na atumilwe ba Bwana Yesu Kilisitu. 18 Kwa mwanjaa mwaabakiyilwe panga, "Masu'ba ga kuundi'la kwaalu'a pitya na bandu bakunsalanga, babaalu'a kota maminyikio gabe bene malau." 19 Bandu bo ngabaleta malekangano, bagania makowe ga dunia bai, wala Loo wa Nnu'ngu' ntu'pu' nkati yabe. 20 Lakini mwenga mwaapendwa bangu', mwiikangamaye muimani yinu yaibile mbeleteu muno, na mulu'be kwa uweso wa Loo Mpeleteu. 21 Muyendeli muupendo wa Nnu'ngu', ku'no kamuyendelya pi'kanilya kwa pulaa kiya sa Bwana witu Yesu, li'nga annete muukoto wangayomoka.

22 Mube na mwoyo wa kiya kwa balu' bababile na kyukala. 23 Bi'ngi' mwakosopoli kwa kwatu'ndu'bi'ya bu'ka mumwoto, na bi'ngi' mwabi'ki kiya, lakini mwiilinguli na kwibi'ka kuutalu na ulau wabe woti.

24 Kwake ywembe ywawesa kunni'ndi'la mwenga mwaakane tu'mbu'ka na kunneta nnu'ngi' ya utukupu wake nku'lu', mubile na pulaa ngu'lu' pangali ulau. 25 Mwene nga Nnu'ngu' kisake, ywabile nkosopoli witu pi'tya kwa Yesu Kilisitu Bwana witu. Nnu'ngu' alumbilwe muno, kwa mwanjaa ywembe ngabile na utukupu, uku'lu', makakala na utawala tumbulya kwai'mbu', nambi'yambi' na mpaka milele. Amina.