1 Wu'no nga uumukwo waupiyite Yesu Kilisitu, waapeyilwe na Nnu'ngu' li'nga aalaye atumisi bake makowe gagapalikwa pitya pamasu'ba gano ga papipi. Kilisitu antumike malaika wake li'nga annaye ntumisi wake Yoani makowe go. 2 Nembe Yoani akong'ondelya goti gaagabweni bu'kana na mayi'gi'yo gagabu'ka kwa Nnu'ngu' na ukong'ondeli wa Yesu Kilisitu. 3 Nantali yake mundu ywasoma kitabu si'no sene mayi'gi'yo ga kilondoli, na nantali yabe babayu'wa no kamwa gagaandikilwe mono, kwa mwanjaa nsimu wa makowe gano wegelile.

4 Nenga na Yoani nigaandikya makanisa saba gagabile kunkoa wa Asia. Ninnu'byanga ngu'ngu' na amani bu'ka kwake ywembe ywabile nambi'yambi', ywaabile na ywaisa, no bu'ka kwa loo saba yaibile nnu'ngi' ya kiti'gu' sake sa lenji, 5 no bu'ka kwa Yesu Kilisitu nkong'ondeli mwu'bi'li'ka, ywalongoli yu'yi'lwa bu'ka kwa awi'li na nga ntawala wa akulungwa boti ba padunia. Ywembe endatupenda, na kwa myai yake aatuyu'wi bu'ka muutabilwe wa sambi, 6 ngaatupanga twenga panga ukulungwa na api'ndo ba dini, tuntumikiye Nnu'ngu' Tati' bake. Kwa Yesu Kilisitu ube utukupu na makakala, milele na milele! Amina.

7 Lingulya! Endaisa na maunde!

Kila mundu ammona, na ata balu' babamwomike.

Makabila goti ga dunia gaalu'a lombola kwa kitumbu sake.

Eloo! Amina.

8 "Nenga nga na Alfa na Omega, Nnongoi na ywa Kuundi'la," abaya Bwana Nnu'ngu' ywabile nambi'yambi', ywaabile na ywaaisa, Mwene Makakala Goti!

9 Nenga na Yoani nannongo winu, nanipangite kiselele pamope na mwenga bu'kana na Yesu mungu'su'mbu', ukulungwa no komeya kwake. Naabile kukisiwa sakikemelwa Patmo kwa kitumbu sa liyi'gi'yo lya Nnu'ngu' na kunkong'ondelya Yesu. 10 Lisu'ba limo lya Bwana, Loo Mpeleteu aatiniulukya. Nganiyu'wa lilobe liku'lu' kusu'gu' yangu' lyaliyu'wanike kati lipenga. 11 Nalyembe lyaatibaya, "Ugaandike mukitabu galu' gaugabona na ugapeleke kwa makanisa saba, Efeso, Simurina, Pergamumu, Tiatila, Sarde, Filadelfia na Laodikia."

12 Bai, nganigalambuka li'nga ninnole aywo ywalongela na nenga, nganiibona inala saba ya imulikyo ya zaabu. 13 Na pakatikati ya yi'lu' inala kwabile na mundu kati Mwana wa Mundu, nembe aaweti nganju ndaso na nkanda wa zaabu pakyuba. 14 Nywili yake yaabile uu muno kati lukanda lwa pamba, na minyo gake gang'alang'atya kati malimi ga mwoto, 15 magu'lu' gake kati kyu'ma sakimelemeteyilwe kwo yoselwa pamwoto, na lilobe lyake lyaai kati mwagayota masi' gambone gagabutuka. 16 Muluboko lwake lwamalyo aabile na ndondwa saba na munkano wake lyaapitike lipanga lyalitema ku'no na ku'no. Kuminyo yake kwaating'alang'atya kati lisu'ba.

17 Bai, panimweni, nganitu'mbu'kya pamagu'lu' gake kati mundu ywawile. Ngabi'ka luboko lwake lwamalyo panani yangu' kabaya, "Kaneuyogope! Nenga Nannongoi na ywa Kuundi'la. 18 Nenga na mwu'mi! Naatiwaa, lakini lingulya, nambi'yambi' na mwu'mi milele na milele! Na nibile na iyu'gu'lyo ya kiwo na ya kumambi'. 19 Bai, ugaandike makowe ga gaugabona, makowe gagapitya nambi'yambi' na gagaalu'a pitya nnu'ngi'. 20 Asi' nga kilombolyo sakiiyilwe sa yi'lu' ndondwa saba na inala saba ya imulikyo ya zaabu yawibweni. Inala saba nga makanisa saba. Ndondwa saba nga malaika bake."