1 Na malaika wa tano payulike lipenga lyake, naalubweni lutondwa lwalutu'mbwike bu'ka kunani tu'mbu'kya padunia. Nalwembe ngalupeyelwa kiyu'gu'lyo sa lyi'mbwa lya kumambi'. 2 Bu'kapo lu'lu' lutondwa ngaluyu'wa li'lu' lyi'mbwa lya kumambi' na lyoi ngalipita bu'ka mo kati lyoi lya litu'ta liku'lu'. Lisu'ba na kunani kwayi'yilwe lubi'ndu' na li'lu' lyoi lyalipitike mulyi'mbwa lyo. 3 Mulyoi lyo ngabapita njige no elelya mudunia. Baapeyilwe uweso wo luma kati ipi'li'li'. 4 Njige bo baamuliswe kanebaalabiye manyei wala maakapi wala mikongo yoyoti. Ila baasulu bandu balu' bangali baa na muuli wa Nnu'ngu' pakibu'ngi' sabe. 5 Njige bo baayi'ki'tilweli kwabulaga bandu, ila baaku'su'mbwe kwa myei mitano. Maminyo gake gaai kati maminyo ga mundu ywalumilwe na kipi'li'li'. 6 Masu'ba go bandu baalu'a kipala kiwo lakini baakipatali, baaminyikia waa lakini kiwo saalu'a kwatila.

7 Njige bo baalandine na falasi babaabi'kilwe wiso kwa ngondo. Panani ya mitwe yabe baaweti kili'be sakibonekana kati taji ya zaabu na kuminyo yabe kwalandine na bandu. 8 Baabile na nywili kati ya alwawa na mino gabe kati mino ga imba. 9 Yuba yabe yawi'ki'lilwe na kiibiliyo sa kyu'ma. Malobe gagauma mumapapayo gabe gabile kati ga mimutuka yambone ya falasi yaibutukya kungondo. 10 Baabile na miki'la yene mimimwa kati ipi'li'li', na uweso wa kwasulu bandu kwa myei mitano wabile mumiki'la yabe. 11 Kai' baabile na nkulungwa naywembe nga malaika wa li'lu' lyi'mbwa lya kumambi', lina lyake kwa Kiebrania nga Abadoni na kwa Kiyunani nga Apolioni lombolya, "Ywalangamisa."

12 Malanganyiko malongoi gayomwike pi'ta no bu'kapo gi'ngi' gabi'li' galu'a ki'ngama.

13 Malaika wa sita paaliyulike lipenga lyake, nganiyu'wa lilobe kalipita bu'ka mumbembe yaibile muitumembe nsese ya kibi'ki'lyo sa zaabu sasaabile nnu'ngi' ya Nnu'ngu'. 14 Li'lu' lilobe ngalimmakia yu'lu' malaika wa sita ywaabile na lipenga panga, "Wayu'gu'li balu' malaika nsese babatabilwe mulibi'ndi' liku'lu' lya Flati." 15 Malaika bo nsese baabi'ki'lwe wiso kwa kitumbu sa saa yo, lisu'ba lyo, mwei wo, na mwaka wo. Baayu'gu'lilwe li'nga babulage lumo kwa itatu ya bandu ba padunia. 16 Naayu'wine panga mitumbi ya mayesi babau'bu'ka falasi yaai milioni mya ibi'li'. 17 Mumaloto gangu', naabweni falasi na au'bu'ka falasi babaabonekine baweti ibiliyo ya yu'ma muyuba yabe yayabile ya lukanda lukele, bulu, na ya manjano. Mitwe ya falasi yabonekine kati mitwe ya imba, mumikano ya falasi bo kwapitike mwoto, lyoi na bwaluti. 18 Lumo kwa itatu ya bandu ba padunia baabulagilwe kwa malanganyiko, yani mwoto, lyoi na bwaluti bu'ka mumikano ya falasi. 19 Makakala ga falasi bo gaai mumikano na mumiki'la yabe. Miki'la yabe yaai kati nng'ambo, na kwa mitwe ya nng'ambo yo baakombwi kwasulu bandu.

20 Bandu babakotwike bulagilwa mumalanganyiko go, baagalambwiyeli myoyo yabe na baakotwikeli kilikitya ili'be yaitengenesilwe kwa moko gabe. Baakilikiti moka, na inyago yaitengenesilwe kwa yu'ma ya samani, maliwe na mikongo, ili'be yaikotoka lola, yu'wa au tyanga. 21 Wala baagalambwili myoyo yabe kwa Nnu'ngu' no leka bulaga, bwabi', upege na bwii.