1 Bu'kapo nganimmona Mwana Ngondolo ayi'mi pakitu'mbi' sa Sayuni. Pamope nakwe baabile bandu mya yimo alubaini na nsese elupu bababile na lina lya Mwana Ngondolo na lina lya Tati' bake liandikilwe muibu'ngi' yabe. 2 Nganiliyu'wa lilobe kalibu'ka kunani kati mwagayota masi' gambone gagabutuka na mwago kati wa njai. Lilobe lyanaliyu'wine lyai kati ndu'ti ya bandu babaoneya ilimba. 3 Bandu bayi'mbage mwambo wayambi' nnu'ngi' ya kiti'gu' sa lenji na nnu'ngi' ya balu' yumbe nsese bene ukoti na balu' agoi. Ntu'pu' mundu ywaakombwi kwiyi'gana mwambo wo ila balu' mya yimo alubaini na nsese elupu bai, babaakosopolilwe bu'ka mudunia. 4 Bandu bo nga balu' bangali kwisapuya kwa alwawa, na bembe nga kati igoli. Abo bammi'ngi'ya Mwana Ngondolo kwokwoti kwayenda. Bakombolilwe bu'ka nkati ya bandu bi'ngi', no pangilwa mili'mbu' kwa Nnu'ngu' na kwa Mwana Ngondolo. 5 Bembe baalongeili ubu'su'bu'su' wala baabileli na lukoolo.

6 Bu'kapo naamweni malaika ywi'ngi' kagu'lu'ka kunani abile na Abali Inannoga ya milele ya Nnu'ngu' yo nwaya kwa balu' babatama mudunia, yani kwa bandu ba kila taipwa, kila kabila, kila nnongelo na kila lukolo. 7 Malaika ngalongela kwa lilobe liku'lu', "Munkwi'ye Nnu'ngu' na munnumbe ywembe kwa mwanjaa saa ya Nnu'ngu' ya kwaukumu bandu yikite. Munkilikiti Nnu'ngu' ywaumbite kunani, dunia, baali na inywanyu ya masi'."

8 Malaika ywenebi'li' ngaanki'ngama yu'lu' nnongoi kabaya "utu'mbwike! Muyi nku'lu' wa Babeli utu'mbwike! Wanyweliye mataipwa goti divai yake yaibabite, kawalobeya na malau ga upege wake."

9 Malaika ywenetatu ngaaki'ngama balu' abi'li' alongoi kabaya, "Manaitei mundu ywoywoti kankilikitya ywo kinyama na kinyago sake no bi'ki'lwa alama pakibu'ngi' sake au muluboko lwake, 10 baalu'a nywa divai ya nyongo ya Nnu'ngu'. Divai yo itengenesilwe kwa makakala gake goti mukikombe sa nyongo ya Nnu'ngu'. Mundu ywo alu'a teselwa mumwoto wa bwaluti nnu'ngi' ya malaika apeleteu na nnu'ngi' ya Mwana Ngondolo. 11 Lyoi lya mwoto lyalibu'kana no tiniyilwa kwabe liu'bu'ka kunani milele na milele. Kwa bandu balu' babaankilikiti yu'lu' kinyama na kinyago sake no bi'ki'lwa alama ya lina lyake, baapu'mu'lyali kilo na muntwekati."

12 Kwa nyo bandu ba Nnu'ngu' babaikoleya amuli yake na kumwu'bi'lya Yesu, bapalikwa baa na ukomeyi.

13 Bu'kapo nganiliyu'wa lilobe bu'ka kunani kalibaya, "Wandike! Nantali yabe bandu balu' tangu' nambi'yambi' babawaa balu'mbine na Bwana." Loo Mpeleteu abaya panga, "Eloo ayo kakape. Baalu'a pu'mu'lya bu'kana na lyengo linannonopa kwa mwanjaa baalu'a pata upo bu'kana na mengo gabe ganannoga."

14 Nganilola nnu'ngi' yangu' na nganilibona lyunde lyu na panani yake paabonekine yumo ywaabile kati Mwana wa Mundu ywaaweti taji ya zaabu muntwe wake na mbopo inantema muluboko lwake. 15 Bu'kapo malaika ywi'ngi' ngaisa bu'ka munyumba ya Nnu'ngu' na kunkema kwa lilobe liku'lu' yu'lu' ywaatami panani ya lyunde kabaya, "Utole mbopo yako ukaune mwanjaa nsimu wo una wikite na mauno ga dunia gakomile." 16 Kwa nyo yu'lu' ywaatami panani ya lyunde ngapi'ti'ya mbopo yake mudunia, na dunia ngaiunilwa. 17 Bu'kapo ngapita malaika ywi'ngi' munyumba ya Nnu'ngu' ya kunani abile na mbopo inantema.

18 Bu'kapo malaika ywi'ngi' ywaabile ntawala wa mwoto ngapita mukibi'ki'lyo naywembe ngaankema yu'lu' malaika mwene mbopo inantema kwa lilobe liku'lu' kabaya, "Utole mbopo yako inantema, ukateme ande ya minjabibu ya dunia, kwa mwanjaa itunda ikomile." 19 Bai, malaika ywo ngapi'ti'ya mbopo yake mudunia no una njabibu ya dunia na kwiyi'ya nkati ya sombo kiku'lu' so komangya njabibu sene nyongo ya Nnu'ngu'. 20 Njabibu yakomangilwe panja ya muyi, myai yatibutuka bu'ka mukikomangilyo mpaka ika ulaso wa kilometa mya itatu. No yendekeya kwa myai yo kwaabile meta yimo na nusu.