1 "Kwa malaika wa kanisa lya Efeso wandike,

Nenga nanikamwa yi'lu' ndondwa saba muluboko lwangu' lwamalyo na nganityanga pakatikati ya inala saba ya imulikyo ya zaabu. Mugapi'kani ganimmakia! 2 Niitangite ili'be yoti yamupanga, kasana kwinu no komeya kwinu. Nitangite panga muwesali kwayi'ki'tya bandu alau, mutikwapekeseni balu' babaikema atumilwe na kumbe atumilwe lili, na mwenga mukwipwile panga abu'su' bai. 3 Kai', nitangite panga mutiku'su'mbu'lwa muno kwa kitumbu sangu' lakini mutikomeya, na munatotokelwali. 4 Lakini nibile na kikowe sangali yi'ki'tyana na mwenga, panga muulei upendo winu wa patumbu kwangu'. 5 Bai, muku'mbu'ki panga kwaku' kwamutu'mbwike li'nga mukanng'alambuki Nnu'ngu' no panga iyendo yamwabile nayo patumbu. Lakini mana mukotwike panga nnyo, naisa kasinu kukibu'ya kinala sa kimulikyo sinu pakibile. 6 Lakini ubile na likowe limo lyanikulumba, panga wisukya iyendo ya Anikolai kati mwaniisukya nenga.

7 Ywabile na makutu go yu'wa, na ayu'we galu' Loo agabakia makanisa. Babaasinda naayalya lyaa, itunda ya nkongo wa ukoto waubile mukyati' sa Nnu'ngu'.

8 "Kwa malaika wa kanisa lya Simurina wandike,

Nenga nga na Nnongoi na ywa Kuundi'la. Naatiwaa, no yu'ka! Mugapi'kani ganimmakia! 9 Niitangite siki yinu na uki'ba winu, pamope no panga mwenga mwa matayili. Nigatangite matukano ga abo bababaya panga bembe Ayahudi, lakini Ayahudi ba kweli lili, ila bandu ba kipi'nga sa Ibilisi. 10 Kanemuyogope ngu'su'mbu' yailu'a isa kwinu. Lingulyange! Ibilisi aalu'a kwayi'ya bi'ngi' binu muutabilwe li'nga mupayilwe, na mwenga mwapata ngu'su'mbu' masu'ba ku'mi. Lakini mube mwaaminika ata ikatei mpaka waa, nanenga nampeyanga taji ya ukoto wangayomoka.

11 Ywabile na makutu go yu'wa, na ayu'we galu' Loo agabakia makanisa. Ywasinda katu aasulikali na kiwo senebi'li'.

12 "Kwa malaika wa kanisa lya Pergamumu wandike,

Nenga nanibile na lipanga lyalitema ku'no na ku'no. Mugapi'kani ganimmakia! 13 Nipatangite pamutama nga pakiti'gu' sa lenji sa Ibilisi! Lakini balo mulikamuliya lina lyangu'. Mwikanili imani yinu kwangu' nenga, ata masu'ba galu' ga Antipa, nkong'ondeli wangu' ywaaminika, paabulagilwe palu' pakitamo sa Ibilisi. 14 Lakini nambi'yambi' nibile na makowe masene gangali yi'ki'tyana na mwenga. Akwo, mubile na bandu bababi'ngi'ya mayi'gano ga Balaamu. Balaamu annyi'ganiye Balaki li'nga Baisilaili bapange sambi kwo lya ilyo yaipiyilwe kwa inyago no panga upege. 15 Nyinyonyo, mukipi'nga sinu kubile na bandu babakamwa mayi'gano ga Anikolai. 16 Bai, mugalambuki kwa Nnu'ngu'. Mana mukani galambuka, niisa kasinu kiyu'ngu'ya no ku'mbwana na bandu bo kwa lipanga lyalibu'ka munkano wangu'.

17 Ywabile na makutu go yu'wa, na ayu'we galu' Loo agabakia makanisa. Ywaasinda nammetulya kilyo sa mana yayaaiyilwe. Kai', naapeya liwe lyu lyaliandikilwe lina lyayambi' panani yake. Ntu'pu' ywalu'a litanga lina li' ila yu'lu' ywalu'a peyelwa liwe lyo.

18 "Na kwa malaika wa kanisa lya Tiatila wandike,

Nenga na Mwana wa Nnu'ngu', nanibile na minyo gagang'alang'atya kati malimi ga mwoto, magu'lu' gangu' kati kyu'ma sakimelemeteyilwe muno. Mugapi'kani ganimmakia! 19 Niitangite ili'be yoti yamupanga, upendo winu, imani yinu, utumisi winu no komeya kwinu. Kai', niibona panga, masu'ba gano mwendanogeya muno kulikoni palu' pamwatumbwile. 20 Lakini nibile na kikowe sangali yi'ki'tyana na mwenga. Mwenga muyi'ki'tyana na makowe ga nnwawa yu'lu' Yezebeli, ywaipanga nnondoli wa Nnu'ngu' lakini kumbe lili. Endayi'gana na kwaobeya atumisi bangu' bapange upege no lya ilyo yaipiyilwe kwa inyago. 21 Nimpei masu'ba go galambuka bu'ka mumasambi gake, lakini ywembe akani kuuleka upege wake. 22 Lingulya! Nilu'a kuntaikulya pakindanda kwa matamwe, ywembe pamope na boti babapangite nakwe upege. Bapala pata ngu'su'mbu' ngali' mana bakani galambuka kwa iyendo yabe akau. 23 Kai', nilu'a kwabulaga babankoleya, li'nga makanisa goti gatange panga nenga nganipekeseni myoyo na gabawasa bandu. Nanni'pa kila mundu bu'kana na iyendo yake.

24 Lakini mwenga mwabi'ngi' mwamubile ku Tiatila mwamukotoka bi'ngi'ya mayi'gano ga Yezebeli, mwiyi'ganiyeli si'lu' sabakikema "Iyo ya Ibilisi," nimmakianga panga nimpeyali kigombo si'ngi'. 25 Lakini mugakamuliye wiso makowe manogau gamubile nago, mpaka panaaisa.

26 Ywaasinda no yendelya panga ganigapendi nenga mpaka kuundi'la, nampeya utawala wa mataipwa.

27 Nembe aalu'a kwatawala kwa pimbo ya kyu'ma na kwakanjwana kati yombo ya utu'pi',

kati nenga mwanipoki bu'ka kwa Tati' bangu'.

28 Nanenga nampeya lu'lu' lutondwa lwa kindai'. 29 Ywabile na makutu go yu'wa, na ayu'we galu' Loo agabakia makanisa."