1 Ngaisa yumo ywa balu' malaika saba babaakamwi ibakuli, ngaanibakia, "Wise ku'no, nilu'a kulaya ukumu ya yu'lu' mpege nku'lu' ywatama papipi na masi' maingi. 2 Akulungwa ba dunia baapangite upege pamope nakwe, na bandu babatama padunia baalobile kwa divai ya upege wake."

3 Bu'kapo yu'lu' malaika nganipu'twa kwa Loo Mpeleteu, na kunipeleka mpaka kulupu'ngu'ti'. Akwo nganimmona nnwawa yumo atami panani ya kinyama nkele ywaabile na maina ga kunkupulu Nnu'ngu' kila pandu muyi'ga yake. Kinyama ywo aabile na mitwe saba na mbembe ku'mi. 4 Nnwawa ywo aaweti ngu'bo ya lukanda lwa sambalau na lukele, kai' aainemike kwa zaabu, maliwe ga samani na lulu. Mumaboko gake aakamwi kikombe sa zaabu sasaatwi'li masukwo na ili'be njapu ya awo upege wake. 5 Pakibu'ngi' sake paandikilwe lina lya iyo, "Babeli Nku'lu', Mau' ba apege na masukwo ga dunia." 6 Nganimmona nnwawa ywo alobile kwo nywa myai ya apeleteu ba Nnu'ngu' babaawile kwa kitumbu sa kunkong'ondelya Yesu.

Panimweni bai, naatisangala muno. 7 Lakini malaika nganilaluya, "Mwanjaa namani usangala? Nilu'a kuawanikia iyo ya nnwawa ywo na aywo kinyama ywamwu'bwike, mwene mitwe saba na mbembe ku'mi. 8 Aywo kinyama ywaumweni abile nkoti patumbu, lakini nambi'yambi' awile, na ywembe abile wiso u'bu'ka bu'ka kumambi' lakini ayenda langamiswa. Na abo babatama padunia bangali andikilwa maina gabe mukitabu sa ukoto bu'ka bi'ki'lwa misingi ya dunia, baalu'a sangala kummona aywo kinyama ywaai nkoto, bu'kapo waa, na nambi'yambi' endapitya kai'.

9 "Pano papalikwa malango na ikima. Ayo mitwe saba nga itu'mbi' saba yaatami aywo nnwawa panani yake. 10 Kai' ayo mitwe saba nga akulungwa saba. Baabile batano babayomwike tu'mbu'ka, ywi'ngi' ngaywatawala nambi'yambi', na abile ywi'ngi' ila anaisali, lakini paalu'a isa aapalikwa tama kwa masu'ba masene bai. 11 Yu'lu' kinyama ywaabile nkoti lakini nambi'yambi' awile, nga nkulungwa wa nane, na ywembe kai' abile mukipi'nga sa abo saba, na ywembe ayenda langamiswa.

12 "Yi'lu' mbembe ku'mi yawibweni nga akulungwa ku'mi bababile balo pokya ukulungwa, lakini baalu'a pokya utawala wo panga akulungwa kwa lisaa limo pamope na yu'lu' kinyama. 13 Mabinio ga atawala aba boti ku'mi gamo, na bembe baalu'a kunnekya yu'lu' kinyama makakala na utawala wabe. 14 Baalu'a ku'mbwana ngondo na Mwana Ngondolo, lakini Mwana Ngondolo aalu'a kwasinda kwa kitumbu sa ywembe nga Bwana wa mabwana na Nkulungwa wa akulungwa. Ywembe aalu'a baa na bandu bake baakemite, baasawile, na babau'bi'li'ka."

15 Bu'kapo aywo malaika nganibakia, "Galu' masi' gaugabweni yu'lu' mpege atami panani yake nga bandu baingi ba mataipwa, alongo na milongelo mbali'mbali'. 16 Yi'lu' mbembe ku'mi yawibweni na yu'lu' kinyama, baalu'a kunsukwa aywo mpege. Baalu'a tola kila kili'be na kunneka watu'pu', baalu'a tauna nnyama yake na kuntiniya kwa mwoto. 17 Kwa mwanjaa, Nnu'ngu' abi'i mumyoyo yabe timisa mabinio gake kwo yi'ki'tya kumpeya yu'lu' kinyama makakala gabe ga utawala, mpaka mayi'gi'yo ga Nnu'ngu' pagaatimya.

18 "Na yu'lu' nnwawa ywaumweni nga wu'lu' muyi nku'lu' waubile na utawala bu'kana na akulungwa ba dunia."