1 Bu'kapo nganimmona malaika ywi'ngi' mwene makakala kauluka bu'ka kunani. Aawalikilwe lyunde na lipi'tannu'ngu' panani ya ntwe wake, na kuminyo yake kwatimelemetya kati lisu'ba na magu'lu' gake gaabile kati mapi'pi'li' gagayakite mwoto. 2 Mumoko gake aakamwi kitabu kisene sakiumukulilwe, ngalubi'ka lugu'lu' lwamalyo mubaali na lwanki'ya kuuyu'mu'. 3 Aakemite kwa lilobe liku'lu' kati imba ywabunguluma, na pakemite, malobe ga njai saba ngagayangwa. 4 Na ayo njai saba paiyangwile naapalike andika, lakini nganiliyu'wa lilobe bu'ka kunani kalinibakia panga, "Mayi'gi'yo ga njai yo saba, kaneuandike, ayo nga iyo."

5 Bu'ka pa go yu'lu' malaika ywanaamweni ayi'mi mubaali na kuuyu'mu' ngatu'ndu'bi'ya luboko lwamalyo kunani, 6 ngalapa kwa lina lya Nnu'ngu' ywa lama milele na milele, Nnu'ngu' ywaumbite kunani na yoti yaibile mo, baali na yoti yaibile mo, dunia na yoti yaibile mo kabaya panga, "Nsimu wo li'nda uyomwike! 7 Lakini nsimu wa malaika wa saba paalu'a liyula lipenga lyake, iyo ya Nnu'ngu' yalu'a timya kati mwaanwayite kwa atumisi bake alondoli."

8 Bu'kapo nganiliyu'wa lilobe kai' bu'ka kunani kalinibakia, "Uyende ukatole si'lu' kitabu sakiumukulilwe mumoko ga yu'lu' malaika ywayi'mi panani ya baali na kuuyu'mu'." 9 Bai, nganiyenda kwa yu'lu' malaika na kunnu'ba si'lu' kitabu, naywembe nganibakia, "Ukitole na ukilye, salu'a panga baba mundumbo yako, lakini munkano wako salu'a nong'omya kati busi."

10 Kwa nyo nganikitola si'lu' kitabu mumoko ga yu'lu' malaika na kukilya. Munkano wangu' saabile kinong'omyau kati busi, lakini panikimilike nndumbo yangu' sai kinammaba. 11 Bu'kapo nganibayilwa panga, "Upalikwa piya ulondoli kai' bu'kana na makabila maingi, mataipwa maingi, ngolo yambone na akulungwa bambone."