1 Bu'ka pa ago, nganaabona malaika nsese bayi'mi mulwingo lwoti lwa dunia, kabawibiliya nsunga kaneuyote ata pasene, munni'ma wala mubaali, wala mumikongo. 2 Bu'kapo, nganimmona malaika ywi'ngi' kau'bu'kya kunani bu'ka kumbwani, abile na muuli bu'ka kwa Nnu'ngu' mwene ukoto. Ngau'bu'ya lilobe na kwabakia abo malaika nsese babakamukiyilwe lyengo lya kualabiya nni'ma na baali kabaya, 3 "Kanemualabiye nni'ma, wala baali, wala mikongo, mpaka patwaayomwa kwabi'ka muuli pakibu'ngi' atumisi ba Nnu'ngu' witu." 4 Bu'kapo, nganiyu'wa isabu ya abo bababi'kilwe muuli, bandu 144,000 ba makabila goti ga bandu ba Isilaili. 5 Bu'ka mukabila ya Yuda bandu 12,000, bu'ka mukabila ya Lubeni 12,000, bu'ka mukabila ya Gadi 12,000. 6 Bu'ka mukabila ya Asheli 12,000, bu'ka mukabila ya Nafutali 12,000, bu'ka mukabila ya Manase 12,000. 7 Bu'ka mukabila ya Simioni 12,000, bu'ka mukabila ya Lawi 12,000, bu'ka mukabila ya Isakali 12,000. 8 Bu'ka mukabila ya Zebuluni 12,000, bu'ka mukabila ya Yosefu 12,000, na bu'ka mukabila ya Benyamini 12,000.

9 Bu'kapo nganilingulya, nganikibona kipi'nga kiku'lu' sa bandu bangaliwesa balangika, bandu ba kila nni'ma, kila kabila, ngolo na kila nnongelo. Nabembe baayi'mi nnu'ngi' ya kiti'gu' sa lenji na nnu'ngi' ya Mwana Ngondolo, baweti makanju mauu no kamwa ndambi' ya mitende mumaboko gabe. 10 Ngabau'bu'ya lilobe kababaya, "Kosopolelwa kwitu kuuma kwa Nnu'ngu' witu ywatama panani ya kiti'gu' sa lenji, no bu'ka kwa Mwana Ngondolo!" 11 Malaika boti ngabayi'ma kukiti'li'ta kiti'gu' sa lenji, agoi na balu' yumbe nsese bau'mi. Ngabatu'la pai' ukukama nnu'ngi' ya kiti'gu' sa lenji na kunkilikitya Nnu'ngu', 12 kababaya, "Amina! Sipwa, utukupu, sukulu, isima, ikima, uweso na makakala gabe kwa Nnu'ngu' witu, milele na milele! Amina!"

13 Yumo ywa balu' agoi nganilaluya, "Aba babaweti makanju mauu nga bandu gani? Na babu'ka kwaku'?" 14 Nenga nganinnyangwa, "Wamwisimiwa, wenga utangite!" Nembe nganibakia, "Aba nga balu' babapite salama muyi'lu' siki ngu'lu'. Baagapulike makanju gabe mumyai ya Mwana Ngondolo, ngagapanga mauu muno. 15 Nga kitumbu so baa nnu'ngi' ya kiti'gu' sa lenji sa Nnu'ngu'. Bantumikia Nnu'ngu' kilo na muntwekati munyumba yake, nembe ywatama panani ya kiti'gu' sa lenji alu'a kwali'ndi'la kwa mwanjaa, abile pamope nabo. 16 Baaminyali njala wala nnyota, lumu wala lyoto lyake lyaatiniyali kai', 17 kwa mwanjaa, Mwana Ngondolo ywabile pakatikati ya kiti'gu' sa lenji, aapanga nsungi wabe, nembe aalongoya kukinywanyu sa masi' ga ukoto. Nembe Nnu'ngu' aagaponwa moli goti gagabile muminyo gabe."