1 Bu'kapo nganimmona malaika kaelya bu'ka kunani, akamwile kiyu'gu'lyo sa kumambi' na nyololo ngu'lu' muluboko lwake. 2 Ngammoywa yu'lu' nng'ambo nku'lu', nng'ambo ywa kwai'mbu', ywaakemilwe Ibilisi au Setani, ngantaba kwa myaka elupu yimo. 3 Malaika ngantaikulya kumambi', no yigala nniango wo yingya mo no yi'ya muuli, li'nga kaneayendeli kai' kugaobeya mataipwa mpaka payatimya myaka elupu yimo. Lakini bu'ka pamyaka yo aapalikwa yu'gu'li'lwa kai', lakini kwa masu'ba masini bai.

4 Bu'kapo nganiibona iti'gu' ya lenji, yabaatami abo babapeyilwe uweso wo ukumu, na abo nga yi'lu' loo ya babaakatilwe mitwe kwa kitumbu sa ukong'ondeli wa Yesu na kwa liyi'gi'yo lya Nnu'ngu'. Balu' babaakotwike kunkilikitya yu'lu' kinyama wala inyago yake, baayi'ki'tili bi'ki'lwa alama ya kinyama ywo muibu'ngi' yabe, au panani ya maboko gabe. Bandu ba baatiyu'ka ngabatawala pamope na Kilisitu myaka elupu yimo. 5 (Awi'li babaigalile baayu'kiteli mpaka paitimile ayo myaka elupu yimo.) Awu' nga uyu'ki nnongoi. 6 Babayaliwite na babapeletike nga balu' bababile na pandu muuyu'ki nnongoi. Bu'kana na kiwo senebi'li', kipanga ntu'pu' makakala, ila baalu'a baa api'ndo ba dini ya Nnu'ngu' na ba Kilisitu, na baalu'a tawala pamope nakwe kwa myaka elupu yimo.

7 Bu'ka payatimya myaka elupu yimo, Ibilisi aalu'a yu'gu'li'lwa bu'ka muutabilwe wake. 8 Na ywembe ngaalu'a pitya panja li'nga kugakonga mataipwa gagabile lwingo lwoti lwa dunia, lombolya Gogu na Magogu. Ibilisi aalu'a kwakongolya pamope kwa ngondo, nabembe baapanga bambone kati lwangi lwa kumbwani. 9 Nabembe ngabatyanga kila pandu padunia, kabati'li'ta maema ga apeleteu, yani wu'lu' muyi waupendilwe na Nnu'ngu'. Lakini mwoto ngauelya bu'ka kunani na kwalangamisa. 10 Na ywembe Ibilisi ywaakongite ngataikulwa mulitanda lya mwoto na bwaluti, pabaataikulilwe yu'lu' kinyama na yu'lu' nnondoli wa ubu'su'. Baalu'a ku'su'mbu'lwa mo kilo na mutwekati, milele na milele.

11 Bu'kapo nganikibona kiti'gu' kiku'lu' sa lenji kiuu, na yu'lu' ywatami panani yake. Dunia na kunani ngakubu'ki'ka nnu'ngi' ya minyo gake, na yaabonekineli kai'. 12 Bu'kapo nganaabona awi'li agoi kwa anangu'ta, bayi'mi nnu'ngi' ya aso kiti'gu' sa lenji na itabu ngaiyu'gu'li'lwa. Bu'kapo kitabu si'ngi' sa ukoti ngakiyu'gu'li'lwa. Abo awi'li ngabaukumilwa sawasawa na iyendo yabe kati mwaiandikilwe nkati ya itabu yo. 13 Baali ngayaapiya awi'li babaabile nkati yake, na kiwo na kumambi' ngakwaapiya awi'li bake babaabile nkati yake. Kila mundu ngaukumilwa bu'kana na iyendo yake yaapangite. 14 Bu'ka pa go, kiwo na kumambi' ngakutaikulwa mulitanda lya mwoto, alyo litanda nga kiwo senebi'li'. 15 Mundu ywoywoti ywangalibonekana lina lyake mukitabu sa ukoti, aataikulilwa mulitanda lya mwoto.