1 Bu'kapo nganiyu'wa lilobe liku'lu' bu'ka munyumba ya Nnu'ngu', kalyaabakia balu' malaika saba, "Muyende mukayakanikiye mudunia ago mabakuli saba ga nyongo ya Nnu'ngu'."

2 Malaika nnongoi, ngayenda yakanikia bakuli yake panani ya nni'ma. Apo balu' boti bababi'kilwe alama ya yu'lu' kinyama na babakilikityage inyago yake ngabapata yu'ngu'pu'te yaiminya muno.

3 Na aywo ywenebi'li', ngayakanikia bakuli yake mubaali, nayembe ngaigalambuka panga kati myai ya mundu ywawile na kila sampuli ya kyumbe sasaabile mubaali ngakiwaa.

4 Malaika ywenetatu ngayakanikia bakuli yake mumabi'ndi' na muinywanyu ya masi', nayembe ngaigalambuka panga myai. 5 Apo nganinnyu'wa malaika nnyi'mi'li'ki ywa masi' kabaya,

"Wenga wampeleteu, waubile na wawaabile!

Wenga upangite aki kugaukumu makowe ga.

6 Mwanjaa, baayitaniye myai ya apeleteu na ya alondoli bako,

na wenga wapei myai banywe,

kati mwabapalikwage."

7 Bu'kapo nganiyu'wa lilobe pakibi'ki'lyo kalibaya, "Eloo, wa Bwana Nnu'ngu' Mwene Makakala Goti! Ukumu yako nga ya kweli na ya aki!"

8 Bu'kapo malaika ywenensese, ngayakanikia bakuli yake panani ya lisu'ba. Lisu'ba ngalipata makakala ga kwatiniya bandu kwa mwoto wake. 9 Bai bandu ngalwabalya muno lumu, nabembe ngabalipwi'wa lina lya Nnu'ngu' ywabile na uweso bu'kana na malanganyiko go. Lakini baagalambwikeli wala bankwi'yiteli Nnu'ngu'.

10 Na aywo malaika ywatano ngayakanikia bakuli yake panani ya kiti'gu' sa lenji sa yu'lu' kinyama nku'lu', popopo ukulungwa wake ngauwi'ki'li'lwa na lubi'ndu'. Bandu ngabatauna ndimi yabe bu'kana no minya, 11 ngabampwi'wa Nnu'ngu' ywa kunani kwo bu'kana no minya kwabe na mabanga gabe, lakini baagalambwikeli bu'ka muiyendo yabe ndau.

12 Malaika wa sita ngayakanikia bakuli yake mulibi'ndi' liku'lu' lyalikemelwa Flati, masi' gake ngagayuma li'nga bi'ka wiso ndi'la kwa kitumbu sa akulungwa bababu'ka kumbwani. 13 Bu'kapo nganiibona loo ya masetani atatu, babalandana na yulaa kabapita munkano wa li'lu' ling'ambo na munkano wa yu'lu' kinyama na munkano wa yu'lu' nnondoli wa ubu'su'. 14 Ayo nga loo ya masetani yaipanga mangelongelo, nayembe ngayayendelya akulungwa boti ba dunia na kwakongolya pamope kwa kitumbu sa ngondo mulisu'ba li'lu' liku'lu' lya Nnu'ngu' Mwene Makakala Goti.

15 Bwana Yesu endabaya, "Mupi'kani, naalu'a isa kati na mwii. Nantali mundu yu'lu' ywatama minyo no wala ngu'bo yake li'nga aakane yenda watu'pu' no pata oni."

16 Bai, masetani ngagakongolya pamope akulungwa boti na mayesi gabe pandu papakemelwa kwa Kiebrania, Armagedoni.

17 Malaika wa saba ngayakanikia bakuli yake kunani kumaunde, na lilobe liku'lu' ngalipitya mu'lu' mukiti'gu' sa lenji munyumba ya Nnu'ngu' kalibaya, "Iyomwike pangika!" 18 Ngakupitya njai, nnindimo na dunia ngailendema muno. Nnendemo wo waai nku'lu' pi'ta yoti yayaapitike bu'ka Nnu'ngu' pamuumbike mundu. 19 Awo muyi nku'lu' ngaubaganika mala itatu, na miyi ya mataipwa ngaialabika yoti. Na ywembe Nnu'ngu' aulibali lili wu'lu' muyi nku'lu' wa Babeli, aupei kikombe si'lu' sa divai ya nyongo yake ngu'lu'. 20 Nnendemo wo wapangite kitumbu so oba isiwa yoti na itu'mbi' yoti yaabonekineli kai'. 21 Ula wa maliwe ngania, maliwe go gaai maku'lu' gagaika kati kilo alubaini kwa kila liwe, ngaani'lya bandu. Na bembe ngabantukana Nnu'ngu' kwa kitumbu sa malanganyiko go, kwa mwanjaa gaabile malanganyiko maku'lu' muno.