1 Bu'ka pa ago nganiyu'wa lilobe kati lya kipi'nga kiku'lu' kunani, kabayoba kwa lilobe liku'lu' kababaya, "Alumbilwe Nnu'ngu'! Ukosopoli, utukupu na uweso nga wa Nnu'ngu' witu, 2 kwa mwanjaa ukumu yake nga ya kweli na aki. Ampei ukumu yu'lu' mpege nku'lu' ywaaikongite dunia kwa upege wake. Nnu'ngu' aatikummukiya kwa kitumbu sa myai ya atumisi bake!" 3 Ngababaya kai', "Alumbilwe Nnu'ngu'! Lyoi lyake awo muyi liu'bu'ka kunani, ata milele na milele." 4 Na balu' agoi isilini nansese pamope na balu' yumbe bene ukoti ngabatu'mbu'ka wakukama kunkilikitya Nnu'ngu' ywatami pakiti'gu' sake sa lenji, kababaya kwa lilobe liku'lu', "Amina! Alumbilwe Nnu'ngu'!"

5 Bu'kapo ngalipitya lilobe bu'ka pakiti'gu' sa lenji kalibaya, "Munnumbe Nnu'ngu' mwenga mwaatumisi bake, mwaboti mwamunkilikitya, agoi kwa anangu'ta!"

6 Kai', nganiyu'wa lilobe kati kipi'nga kiku'lu' sa bandu, na kati mwagayota masi' gambone gagabutuka na kati mwago wa njai, kabapanga ndu'ti baya, "Nnu'ngu' alumbilwe! Kwa mwanjaa Bwana Nnu'ngu' witu Mwene Makakala Goti endatawala! 7 Tupulaike no u'pi'la, tumpei utukupu! Kwa mwanjaa lisengele lya Mwana Ngondolo liikite, na ywaku'nda ayomwike kwibi'ka wiso. 8 Na ywembe apeyilwe uweso wo wala ngu'bo ya kitani uu yaipeletike na yaing'alang'atya!" (Ngu'bo yo ya kitani uu ilaya yendo inannoga ya bandu bake Nnu'ngu'.)

9 Bu'kapo malaika nganibakia, "Uandike ga. Nantali balu' babakokilwe kulisengele lya Mwana Ngondolo!" Na ywembe ngayongeya baya, "Aga nga mayi'gi'yo ga kakape ga Nnu'ngu'." 10 Apo nganitu'mbu'ka wakukama mumagu'lu' gake li'nga kunkilikitya, lakini ywembe nganibakia, "Kaneupange nyo! Ata nenga nantumisi kati wenga, pamope na alongobo babankong'ondelya Yesu. Unkilikiti Nnu'ngu'! Kwa mwanjaa, ukong'ondeli bu'kana na Yesu nga kitumbu sa ulondoli."

11 Bu'kapo nganikubona kunani kuyu'gwike na nnu'ngi' yangu' aabile falasi mmu, na yu'lu' ywamwu'bwike aakemilwe "Mwu'bi'li'ka" na "Wa kakape." Aywo endaukumu no ku'mbwana ngondo kwa aki. 12 Minyo gake nga kati malimi ga mwoto na panani ya ntwe wake kubile na mataji gambone. Aandikilwe lina lyangalitanganikwa na mundu ywi'ngi', ila mwene kisake. 13 Aawati nganju yaisuyilwe mumyai, na ywembe akemelwa, "Liyi'gi'yo lya Nnu'ngu'." 14 Mayesi ba kunani baatikunki'ngama, bau'bwike falasi bauu, ku'no baweti ngu'bo ya kitani mbeleteu, uu na inannoga. 15 Munkano wake lipita lipanga linantema, kwa lipanga lyo alu'a kugatu'mbu'ya mataipwa. Na ywembe aalu'a kugatawala kwa pimbo ya kyu'ma no li'bata divai musombo sakilaya nyongo ngu'lu' ya Nnu'ngu' Mwene Makakala Goti. 16 Munganju yake na mulibando lyake mwaandikilwe lina li', "Nkulungwa wa akulungwa na Bwana wa Mabwana."

17 Na nenga nganimmona malaika ayi'mi mulisu'ba, ngaakema iyuni boti babagu'lu'ka kwa lilobe liku'lu', "Mwise, mukongoleke kwa kitumbu sa kalamu ngu'lu' ya Nnu'ngu', 18 mwise li'nga mupate lya nyama ya akulungwa, agoi ba ngondo, ya bandu bene makakala, nyama ya falasi na yaau'bu'ka falasi, nnyama ya bandu boti, ya abanda na ya angwana, ya agoi na anangu'ta."

19 Bu'kapo nganimmona yu'lu' kinyama na akulungwa wa dunia pamope na mayesi gabe bakongolekine pamope li'nga ku'mbwana ngondo na yu'lu' ywaamwu'bwike falasi pamope na yesi lyake. 20 Lakini yu'lu' kinyama ngaboyolwa pamope na aywo nnondoli ywa ubu'su' ywapangage mangelongelo kwa kitumbu sa kinyama ywo. Kwa mangelongelo go aakongite balu' babaapoki alama ya aywo kinyama na kuikilikitya inyago yake. Abi'li' ba ngabataikulwa babile akoti mulitanda lya mwoto lyaliyaka kwa bwaluti. 21 Na mayesi gabe ngagabulagilwa kwa lipanga lyalyabu'i munkano wa yu'lu' ywamwu'bwike falasi, na iyuni yoti ngaiyukuta kwa nyama yabe.