1 Na apo, nganipeyelwa nnai wawaabile kati lutela lwo li'ngya, no bayilwa, "Uyende ukali'nge nyumba ya Nnu'ngu', pamope na kibi'ki'lyo, na kwabalanga bandu babakilikitya mo. 2 Lakini kaneuli'nge luwa lwa panja ya nyumba ya Nnu'ngu', kwa mwanjaa apo baapeyilwe bandu bangali Ayahudi. Bembe baalu'a li'bata muyi mpeleteu wa Yelusalemu kwa myei alubaini nebi'li'. 3 Na nenga naalu'a kwatuma akong'ondeli bangu' abi'li' bo piya ulondoli kwa masu'ba galu' elupu yimo mya ibi'li' na sitini baweti mabunia."

4 Abo akong'ondeli abi'li' nga mikongo ibi'li' ya minjaituni na inala ya imulikyo ibi'li' yaiyi'ma nnu'ngi' ya Nnu'ngu' ywatawala dunia yoti. 5 Manaitei mundu kapaya kwasulu abo akong'ondeli, mwoto wapita mumikano yabe na kwalangamisa andumu babe. Na kwa ndi'la yo, nyinyonyo mundu ywalu'a paya kwasulu aalu'a bulagilwa. 6 Akong'ondeli ba babile nawo uweso wo kanikia ula kaneanie munsimu wa ulondoli. Kai' babile nawo uweso wa galambuya masi' gapange myai no leta malangamiso ga kila sampuli mudunia kati mwabapendile.

7 Bai, pabayomwa piya ulondoli wa Nnu'ngu', si'lu' kinyama sakibu'kite kumambi' salu'a ku'mbwana nabo na alu'a kwasinda na kwabulaga. 8 Mitwi yabe yaigala musimbasimba ya muyi nku'lu', wu'lu' waabambilwe Bwana wabe. Muyi wo ubile na loo yailandana na Sodoma na Misili. 9 Kwa masu'ba gatatu na nusu, bandu ba kila kabila, kila lukolo, kila nnongelo na kila taipwa baalu'a kwilola mitwi yabe na baayi'ki'ti'yali basikilwe. 10 Bandu ba padunia baapulaikya kiwo sa abo alondoli abi'li' ba Nnu'ngu' kwo panga si'li'ku'si'li'ku' no peyana upo mbali'mbali', kwa mwanjaa alondoli baa baatikwaauya muno bandu ba padunia. 11 Lakini bu'ka pamasu'ba gatatu na nusu mbu'mwo ya ukoti bu'ka kwa Nnu'ngu' ngayayingya nabembe ngabayi'ma, na boti babaabweni baatiyogopa muno. 12 Apo balu' alondoli abi'li' ngabaliyu'wa lilobe bu'ka kunani kalyabakia, "Mwise ku'no kunani." Nabembe ngabau'bu'ka kunani kumaunde ku'no andumu babe kabaalola. 13 Saa yoyoyo ngakupita nnendemo nku'lu' wa bwi' na lumo kwa ku'mi ya muyi ngaitu'mbu'ka. Bandu elupu saba ngababulagilwa munnendemo wo, nabembe babaaigile ngabayogopa, ngabankwi'ya Nnu'ngu' wa kunani. 14 Malanganyiko genebi'li' gayomwike pi'ta, na malanganyiko genetatu gendaki'ngama kiyu'ngu'ya.

15 Yu'lu' malaika wa saba ngayula lipenga lyake, ngakubaa na lilobe liku'lu' kunani kalibaya, "Ukulungwa wa dunia upangike ukulungwa wa Bwana witu na Kilisitu wake. Naywembe aatawala milele na milele." 16 Nabembe balu' agoi isilini na nsese babatami nnu'ngi' ya Nnu'ngu' mwiiti'gu' yabe ya lenji ngabatu'la pai' wakukama na kunkilikitya Nnu'ngu', 17 kababaya,

"Twendakusukulu wa Bwana Nnu'ngu' Mwene Makakala Goti,

waubile na wawaabile,

kwa mwanjaa utumi makakala gako maku'lu' na nambi'yambi' wendatawala.

18 Bandu ba mataipwa baatiusika,

lakini nyongo yako isile,

eloo, nsimu wa kwaukumu babawile.

Nga nsimu wa kwapeya upo atumisi bako alondoli,

apeleteu na boti babalikwi'ya lina lyako, agoi kwa anangu'ta.

Nga nsimu wa kwalangamisa babalangamisa dunia."

19 Bu'kapo nyumba ya Nnu'ngu' yaibile kunani ngaiyu'gu'li'lwa, na lisanduku lya lilagano lyake ngalibonekana nkati yake. Na apo ngakupita bweya wa njai na nnindimo wake, ndu'ti, nnendemo wa nni'ma na ula nku'lu' wa maliwe.