1 Bu'kapo nganiubona mwasu wi'ngi' nku'lu' wa ayabu na wausangalilwa muno kunani. Apo paabile na malaika saba bene malanganyiko saba ga kuundi'la, kwa malanganyiko go saba, nyongo ya Nnu'ngu' ngaitimya.

2 Nganikibona kili'be kati baali ya kilolo yaiyangabanike na mwoto, mbwega ya baali yo baabile bandu bayi'mi balu' babansindike yu'lu' kinyama na kinyago sake pamope na isabu ya lina lyake. Mumaboko gabe baakamwi ilimba yabaapeyilwe na Nnu'ngu'. 3 Baabile kabayi'mba mwambo wa Musa, ntumisi wa Nnu'ngu' na wa Mwana Ngondolo,

"Bwana Nnu'ngu' Mwene Makakala Goti,

iyendo yako ngu'lu' na ya ayabu muno!

Wa nkulungwa wa mataipwa,

mali'la gako nga ga aki na kakape!

4 Bwana nga nyai ywakotoka kukuisimu wenga?

Nyai ywakotoka kulikwi'ya lina lyako?

Wenga kisako nga wa mpeleteu.

Mataipwa goti gaakuisilya na kukukilikitya

mwanjaa iyendo yako ya aki itanganikwe."

5 Bu'ka pa go nganiibona nyumba ya Nnu'ngu' iyu'gu'lilwe kunani, yani ema yailaya baa kwa Nnu'ngu'. 6 Bai, balu' malaika saba bene malanganyiko saba ngabapita mo baweti ngu'bo ya kitani sapi inammelemetya na nkanda wa zaabu muyuba yabe. 7 Bu'kapo yumo ywa balu' yumbe nsese yene ukoti ngaapeya malaika mabakuli saba ga zaabu gagatwi'li nyongo ya Nnu'ngu' ywalama milele na milele. 8 Nyumba ya Nnu'ngu' yaatwi'li lyoi lyalibu'kana na utukupu na makakala ga Nnu'ngu'. Ntu'pu' ywakombwa yingya munyumba yo ya Nnu'ngu' mpaka palu' malanganyiko saba ga malaika saba pagayomokile.