1 Mwana Ngondolo pauti'kwaniye muuli wa saba, kunani ngakubaa liki kwa nusu ya lisaa limo. 2 Bu'kapo, nganaabona malaika saba babayi'ma nnu'ngi' ya Nnu'ngu', baapeyilwe mapenga saba.

3 Malaika ywi'ngi' aatiisa, ngatola aso kiteso sa zaabu no yi'ma nnu'ngi' ya kibi'ki'lyo so ukikiya ubani. Nembe ngapeyelwa ubani wambone li'nga aupiye salaka pamope na malu'bo ga bandu boti ba Nnu'ngu' panani ya kibi'ki'lyo sa zaabu yaibile nnu'ngi' ya kiti'gu' sa lenji. 4 Lyoi lya ubani pamope na malu'bo ga apeleteu gau'bwike kunani nnu'ngi' ya Nnu'ngu' bu'ka mumaboko ga aywo malaika. 5 Ngakitola aso kiteso na kukitwi'li'ya mwoto wa pakibi'ki'lyo na kukitaikulya padunia. Ngakubaa na njai, nnindimo, na nnendemo wa bwi'.

6 Balu' malaika saba babaabile na mapenga saba baaibi'i wiso yula mapenga gabe.

7 Malaika nnongoi ngayula lipenga lyake. Nnyangabaniko wa ula wa maliwe na mwoto pamope na myai ngaiyitilwa panani ya nni'ma. Lumo kwa itatu ya nni'ma, mikongo na mabaliko gake ngaitinika.

8 Bu'kapo, malaika ywenebi'li' ngayula lipenga lyake. Kili'be kati kitu'mbi' kiku'lu' sakiyaka mwoto saataikulilwe mubaali. Lumo kwa itatu ya baali ngaipanga myai, 9 lumo kwa itatu ya yumbe ya mubaali ngaiwaa, na lumo kwa itatu ya meli ngaialabika.

10 Bu'kapo, malaika ywenetatu ngayula lipenga lyake. Na lutondwa luku'lu' kaluyaka kati kyenge sa mwoto ngakitu'mbu'ka bu'ka kunani no tu'la panani ya lumo kwa itatu ya mabi'ndi' na inywanyu ya masi'. 11 Na lina lya lu'lu' lutondwa lukemelwa "Lubabau." Bai, lumo kwa itatu ya masi' ngagapanga mababau, bandu bambone ngabawaa bu'kana na masi' go, kwa mwanjaa gaagalambwike panga mababau.

12 Bu'kapo malaika ywenensese ngayula lipenga lyake. Ngapo lumo kwa itatu ya lisu'ba, mwei na ya lutondwa ngaiku'mbu'lwa, kwa nyo ata bweya ngauobeya lumo kwa itatu yo ng'alang'atya kwake. Lumo kwa itatu ya muntwekati ngaikosa bweya, nyinyonyo na lumo kwa itatu ya kilo.

13 Bu'kapo, nganilingulya nganinnyu'wa tai kagu'lu'ka kunani muno kabaya kwa lilobe liku'lu', "Baakibona, baakibona, baakibona balu' babatama padunia palu' malaika atatu babaigalile pabaalu'a yula mapenga gabe!"