1 Bu'kapo nganikibona kitabu muluboko lwamalyo ga aywo ywatami panani ya kiti'gu' sa lenji, nasembe saandikilwe lwingo lwoti, no yigalilwa kwa miuli saba. 2 Nganimmona kai' malaika mwene makakala kanwaya kwa lilobe liku'lu', "Nyai mwene aki yo ti'kwana ayo miuli na kukiumukwa kitabu so?" 3 Lakini aapatikineli mundu ywoywoti kunani wala padunia, wala pai' kumambi', ywawesite kukiumukwa aso kitabu au kukilingulya nkati. 4 Bai, nenga naatili'la muno kwa mwanjaa, aapatikineli mundu ywaabile na aki ya kukiumukwa au kukilingulya nkati. 5 Lakini yumo ywa balu' agoi aatinibakia, "Kaneuli'le! Imba bu'ka mukabila ya Yuda, Mmelekwe wa lukolo lwa Daudi asindike na ngaywawesa ti'kwana miuli yake saba na kukiumukwa kitabu."

6 Bu'kapo nganimmona Mwana Ngondolo ayi'mi papipi na kiti'gu' sa lenji ati'li'tilwe na yumbe nsese yene bwu'mi na abo agoi. Mwana Ngondolo aabonekine kati atesinjilwa. Aabile na mbembe saba na minyo saba, ayo nga loo saba ya Nnu'ngu' yaitumilwe padunia yoti. 7 Mwana Ngondolo ywo ngayenda na kukitola aso kitabu bu'ka muluboko lwa kummalyo lwa yu'lu' ywatami panani ya kiti'gu' sa lenji. 8 Bu'ka pa Mwana Ngondolo kukitola si'lu' kitabu, yumbe nsese yene bwu'mi na agoi isilini na nsese baayinime nnu'ngi' ya Mwana Ngondolo. Boti baabile na kilimba, kai' baakamwi mabakuli ga zaabu gagatwi'li ubani, ago nga malu'bo ga bandu apeleteu ba Nnu'ngu'. 9 Nabembe baabile kabayi'mba mwambo wu'no wayambi' kababaya,

"Wenga ubile na aki ya kukitola kitabu,

na kwiti'kwana yundo ya miuli yake.

Kwa mwanjaa, wenga waatisinjilwa,

na kwa ndi'la ya myai yako, umpi'mi Nnu'ngu' witu

bandu bu'ka kila kabila, ba kila nnongelo, ba kila ngolo na kila taipwa.

10 Wapei ukulungwa wa upi'ndo wa dini li'nga bantumikiye Nnu'ngu' witu,

nabembe baatawala padunia."

11 Bu'kapo nganilinga, nganiyu'wa malobe ga malaika bambone bangaliwesa balangika, maelupu kwa maelupu, na maku'mi elupu mala maku'mi elupu, baatami kwo ti'li'ta kiti'gu' sa lenji pamope na yumbe yene bwu'mi na agoi isilini na nsese, 12 kababaya kwa lilobe liku'lu',

"Mwana Ngondolo ywaasinjilwe, abile na aki yo pokya

uweso, utayili na ikima, makakala, isima, utukupu na sipwa!"

13 Nganiyu'wa yumbe yoti kunani, padunia, pai' ya dunia na mubaali, yumbe yoti padunia kaibaya,

"Kwake ywembe ywatama pakiti'gu' sa lenji,

na kwa Mwana Ngondolo,

ibe sipwa na isima na utukupu na lenji,

milele na milele."

14 Na balu' yumbe nsese bau'mi baatibaya, "Amina!" Na balu' agoi baatu'i ukukama na kwakilikitya.