1 "Kwa malaika wa kanisa lya Sarde wandike,

Nenga nanikamwa loo saba ya Nnu'ngu' na ndondwa saba. Mugapi'kani ganimmakia! Niitangite ili'be yoti yamupanga. Ibayilwa panga mwenga mwabau'mi kumbe muwile. 2 Muyumuke! Mube mwa bandu bo keleka, mugabi'ke wiso makowe gagaigalile gagaegelya waa. Kwa mwanjaa niibweni panga iyendo yinu munayomolelyali nnu'ngi' ya Nnu'ngu' wangu'. 3 Bai, muku'mbu'ki galu' gamugapokile na kugapi'kaniya, mugayu'we na munki'li'bu'ki Nnu'ngu'. Muyumuke! Mana nyoli, niisa kasinu kiimuimu kati mwii, mwaatangali panaalu'a isa. 4 Lakini kubile na aumini asene akwo Sarde, bembe banasapuyali magu'bo gabe kwo panga sambi. Bai, baalu'a tyanga pamope na nenga, nabembe baawalikilwa magu'bo mauu, kwa mwanjaa bandu bo babile na aki yo pangilwa nyo.

5 Ywaasinda, nang'walika ngu'bo uu kati bo. Naaliputali lina lyake mukitabu sa ukoto katu, kai' nannyi'ki'tya nnu'ngi' ya Tati' na malaika babe panga ayu' nga ywangu'. 6 Ywabile na makutu go yu'wa, na ayu'we galu' Loo agabakia makanisa.

7 "Kwa malaika wa kanisa lya Filadelfia, wandike,

Nenga nanibile nampeleteu na ywa kakape, na nganibile na si'lu' kiyu'gu'lyo sa Daudi. Mana niyu'wile, ntu'pu' ywawesa yigala, mana niyigile, ntu'pu' mundu ywawesa yu'wa. Mugapi'kani ganimmakia! 8 Niitangite ili'be yoti yamupanga! Lelo, niyu'wi nniango nnu'ngi' yinu, wembe ntu'pu' mundu ywawesa kuuyigala. Nitangite panga mwenga ntu'pu' makakala muno, lakini muwesite kuliyu'wa liyi'gi'yo lyangu' na mulikanili lina lyangu'. 9 Lingulyange! Naaleta kwinu bandu ba kipi'nga sa Ibilisi, balu' bababaya panga bembe Ayahudi, lakini Ayahudi ba kweli lili, ila bendaku'pi'ya. Eloo, naaleta kwinu na kwapanga bakilikite nnu'ngi' yinu, li'nga bapate tanga panga nimpendi mwenga. 10 Kwa mwanjaa mwikamwi amuli yangu' yo komeya, naalu'a kunni'ndi'la nsimu wa tabu yayaaisa padunia, nsimu wa mapayilwo ga kila ywatama padunia. 11 Nisa kasinu kiyu'ngu'ya! Mukikamuliye samubile naso nambi'yambi', li'nga taji yinu yaakane pokonyolwa na mundu ywoywoti.

12 Ywaasinda, naalu'a kumpanga abe luyi'ma munyumba ya Nnu'ngu' wangu', aywo aapitali mo. Kai', naalu'a kumwandika lina lya Nnu'ngu' wangu' na lina lya kilambo sa Nnu'ngu' wangu' muyi'ga yake. Na kilambo so nga Yelusalemu yaayambi' yayaauluka bu'ka kunani kwa Nnu'ngu' wangu'. Kai', naalu'a kumwandika lina lyangu' lyayambi'.

13 Ywabile na makutu go yu'wa, na ayu'we galu' Loo agabakia makanisa.

14 "Kwa malaika wa kanisa lya Laodikia wandike,

Nenga nanibile Amina, nankong'ondeli ywau'bi'li'ka na ywa kweli, ywabile sokosoko ya yumbe yoti ya Nnu'ngu'. Mugapi'kani ganimmakia! 15 Niitangite ili'be yoti yamupanga! Nitangite panga mwenga mubileli mwabaimu wala mwapyu'u. Ilu'e panga male mukabaa mwabaimu au mwapyu'u. 16 Bai, kwa mwanjaa ali yinu ya utombolou, kwenda ya upyu'u wala ya bwimu lili, nilu'a kumuuna kati mmata munkano. 17 Mwenga mwiibaya, "Twenga twa matayili, tupu'ngu'ki'lwali kikowe sosoti," kumbe mutangiteli panga mwenga ali yinu ya pai' kai' ipalikwa mubi'ki'lwe kiya, mwaki'ba, mwakimbulibuli, na mutami watu'pu'. 18 Ninkong'ondelyanga mupi'me zaabu yaipeleteyilwe kwa mwoto bu'ka kwangu' nenga, li'nga mupate baa mwa matayili ba kweli. Kai', mupi'me magu'bo mauu, li'nga muwale no wi'ki'lya oni ya utu'pu' winu. Mupi'me na mauta mukapakale kuminyo yinu mupate lola. 19 Nenga nga ywakunkwi'li'ka na kumpwatya ywoywoti ywanimpenda. Kwa nnyo, mukasane na kunng'alambukya Nnu'ngu'. 20 Pi'kaniange! Nenga niyi'ma paniango no panga u'li. Mana mwaayu'wa lilobe lyangu' na kuuyu'wa nniango, naalu'a yingya mumayumba ginu no lya pamope namwenga, namwenga mwalya pamope na nenga.

21 Ywaasinda, naalu'a kunnyi'ki'tya tama pamope na nenga panani ya kiti'gu' sangu' sa lenji, kati nenga namwene mwanisindike no tama pamope na Tati' bangu' panani ya kiti'gu' sabe sa lenji.

22 Ywabile na makutu go yu'wa, na ayu'we galu' Loo agabakia makanisa."