1 Bu'kapo naakibweni kinyama kiku'lu' sene mbembe ku'mi na mitwe saba kakipita mubaali. Na kila lupembe lwaabile na taji, na kila ntwe wabile uandikilwe lina lya kunkupulu Nnu'ngu'. 2 Kinyama so sanaakibweni salandine na u'bi' na magu'lu' gake gaabile kati ga dubu*, nkano wake waabile kati nkano wa imba. Li'lu' ling'ambo lyampei aywo kinyama makakala gake, kiti'gu' sake sa lenji na utawala nku'lu'. 3 Ntwe gumo wa kinyama ywo wabonekine kati upotekilwe muno, lakini libanga lyo liku'lu' lyaponi. Bandu boti ba padunia baatisangala na kunki'ngama ywembe. 4 Nabembe ngabatumbwa kulikilikitya li'lu' ling'ambo kwa mwanjaa lyampei uweso wake yu'lu' kinyama. Kai' baankilikiti yu'lu' kinyama kababaya, "Nyai ywalandana na kinyama yu'? Nyai ywakombwa ku'mbwana ngondo nakwe?"

5 Bu'kapo aywo kinyama aayi'ki'tilwe longela makowe ga salau na ga kupulu, no tumya utawala wake kwa myei alubaini nebi'li'. 6 Kinyama ywo nku'lu' ngatumbwa kumpwi'wa Nnu'ngu', kulipwi'wa lina lyake, potamo wake na boti babatama kwo kunani. 7 Aayi'ki'tilwe ku'mbwana ngondo na apeleteu ba Nnu'ngu' no sinda. Ngapeyelwa utawala kwa bandu ba kila kabila, kila lukolo, kila nnongelo na kila taipwa. 8 Na bandu boti babatama mudunia baankilikitya kinyama ywo, ila balu' bai bene maina gagaandikilwe bu'ka kwai'mbu' mukitabu sa ukoti sa Mwana Ngondolo ywasinjilwe.

9 Mwene makutu na agayu'we makowe ga.

10 Mundu ywabinilwe panga ntabilwe, aatabilwa,

na ywabinilwe bulagilwa kwa lipanga, aabulagilwa kwa lipanga.

Kwa nyo bandu ba Nnu'ngu' bapalikwa komeya no baa na imani.

11 Bu'kapo nganimmona kinyama ywi'ngi' kau'bu'ka bu'ka pai' mudunia. Aabile na mbembe ibi'li' kati ya mwana ngondolo, lakini aalongei kati ling'ambo. 12 Kinyama ywo aatumi utawala wu'wu'lu'wu'lu' wa kinyama nnongoi kwa kitumbu sake. Autumi utawala wo li'nga kumpanga kila mundu ywatama mudunia ankilikiti kinyama ywo nnongoi, nga yu'lu' mwene libanga lya kiwo lyaliponi. 13 Yu'no kinyama ywenebi'li' aapangite mangelongelo maku'lu', ata kuupanga mwoto ueli bu'ka kunani isa mudunia bandu kabalola mpu'la. 14 Kinyama yu'no ywenebi'li' aakongite bandu babatama padunia kwo tumya mangelongelo gaapeyilwe uweso wa kugapanga kwa kitumbu sa kinyama nnongoi. Aamulise bandu tengenesa kinyago li'nga kumwisimu kinyama nnongoi, ywaapotekilwe kwa lipanga lakini aayendeli lama. 15 Kinyama ywenebi'li' aapeyilwe uweso wa kukipeya mbu'mwo ya ukoti kinyago sa kinyama nnongoi. Bu'kapo kinyago sawesite longela na kwaamulisa bandu boti babaakotoka kukikilikitya kinyago so babulagilwe. 16 Kinyama ywenebi'li' nga ywaamulise bandu boti, agoi kwa anangu'ta, matayili kwa aki'ba, angwana kwa abanda, babi'ki'lwe alama panani ya maboko gabe gammalyo au muibu'ngi' yabe. 17 Aakanikiye kwa mundu ywoywoti pi'ma wala pi'mi'ya ila kwa balu' bababi'kilwe alama yo, yani lina lya aywo kinyama au isabu yaiyi'ma paali pa lina lyo.

18 Likowe li' lipalikwa ikima, ywoywoti ywabile na malango awesa balanga isabu ya aywo kinyama kwa mwanjaa, isabu yo ya mundu nsi'si'. Nayembe nga mya sita sitini na sita.