1 Bu'ka pa go, naatilingulya nganiubona nniango uyu'gu'lilwe kunani. Na li'lu' lilobe lyanaaliyu'wine palongoi lyaabile kati lipenga kalibaya, "Wise pano panani, li'nga nikulaye makowe gagapalikwa pitya nnu'ngi'." 2 Imukya, Loo Mpeleteu nganiulukya, nganikibona kiti'gu' sa lenji akwo kunani kitamilwe na mundu yumo. 3 Aywo ywatami panani yake aabile nng'olou kati liwe likele lya samani. Kiti'gu' so saati'li'tilwe na lipi'tannu'ngu' lyaling'alang'atya muno. 4 Kwaabile na iti'gu' yi'ngi' isilini nansese kaiti'li'ta kiti'gu' sa lenji, na panani ya iti'gu' yo baatami agoi isilini na nsese babaabile baweti magu'bo mauu na taji ya zaabu mumitwe. 5 Kiti'gu' so sa lenji kipiyage njai na nnindimo. Nnu'ngi' yake paabile na imulikyo saba kaiyaka mwoto. Imulikyo yi' nga yi'lu' loo saba ya Nnu'ngu'. 6 Nnu'ngi' ya kiti'gu' sa lenji, kwabile na kili'be kati baali ya kilolo. Baali yo yaabile kati liwe lyaling'alang'atya muno.

Mbwega ya kiti'gu' sa lenji paabile na yumbe nsese yene bwu'mi, yayaati'li'tike lwingo lwoti lwa kiti'gu' so, yayaabile na minyo kila pandu. 7 Kyumbe kilongoi saalandine na imba, senebi'li' saalandine na ng'ombe nnu'me, senetatu saalandine na kuminyo ya mundu, na senensese saalandine na tai ywagu'lu'ka. 8 Yumbe yo nsese yaabile na mapapayo sita, na kila pandu paabile na minyo. Yumbe yo yaabile kaiyi'mba pangali pu'mu'lya kilo na muntwekati. Mwambo wene waabile wu',

"Mpeleteu, Mpeleteu, Mpeleteu,

Bwana Nnu'ngu' Mwene Makakala Goti,

aabile, ywabile, na ywaisa."

9 Yumbe yo, yendekunnumba, kumwisimu, na kunsukulu yu'lu' ywatami pakiti'gu' sa lenji na ywalama milele na milele, 10 na balu' agoi isilini na nsese, baitu'yage pai' nnu'ngi' ya aywo ywatami pakiti'gu' sa lenji na kunkilikitya ayu' ywalama milele na milele. Nabembe bampikiage mataji gabe nnu'ngi' ya kiti'gu' sa lenji kababaya nnya,

11 "Wenga wa Bwana na Nnu'ngu' witu aki yako

pokya utukupu na isima na makakala.

Kwa mwanjaa wenga waumbite ili'be yoti,

na kwo penda kwako yaumbilwe, na ibile."