1 Bu'ka pa ago kwapitike mwasu nku'lu' kunani. Paabile na nnwawa ywaawalikilwe lisu'ba na mwei pai' ya magu'lu' gake, na pantwe wake paabile na taji ya ndondwa ku'mi nebi'li'. 2 Na nnwawa ywo aabile ntopelwe, naywembe ngabu'bu'la kwa lilobe kwa kitumbu sa lwu'ngu' lwo papa.

3 Kwapitike mwasu wi'ngi' akwo kunani, panga lyabonekine ling'ambo liku'lu' likele lyene mitwe saba, mbembe ku'mi na kila ntwe waabile na taji. 4 Nki'la wa ling'ambo lyo wakumbike lumo kwa itatu ya ndondwa ya kunani na kwitaikulya mudunia. Nga li'lu' ling'ambo ngaliyi'ma nnu'ngi' ya yu'lu' nnwawa ywabile pipi no papa mwana li'nga aammile mwana ywo paabelekwa bai. 5 Yu'lu' nnwawa ngapapa mwana nnalu'me, ywaalu'a gatawala mataipwa goti kwa pimbo yake ya kyu'ma. Lakini mwana ywo ngakosopolelwa no pelekelwa kwa Nnu'ngu' kukiti'gu' sake sa lenji. 6 Aywo nnwawa ngabutukya kulupu'ngu'ti' kwaabi'kilwe wiso na Nnu'ngu' li'nga akotelwe kwa masu'ba elupu yimo na mya ibi'li' na sitini.

7 Bai, ngakubaa na ngondo akwo kunani, Mikaeli na malaika bake ngabaku'mbwana na ling'ambo, na alyo ling'ambo na malaika bake ngabaku'mbwana nabo. 8 Lakini li'lu' ling'ambo na malaika bake baatisindwa no obeya lipala lyabe akwo kunani. 9 Li'lu' ling'ambo liku'lu' lyalyaataikulilwe pai', lyaatami bu'ka kwai'mbu', lyaakemilwe Ibilisi au Setani ywaikonga dunia yoti, pamope na malaika bake.

10 Bu'kapo nganiliyu'wa lilobe liku'lu' kunani kalibaya, "Nambi'yambi' ukosopoli na uweso na ukulungwa wa Nnu'ngu' witu wisile na utawala wa Kilisitu wake. Kwa mwanjaa, ataikulilwe pai' nsitakili wa alongo bitu, ywasitakya nnu'ngi' ya Nnu'ngu' kilo na muntwekati. 11 Alongo bitu bansindike kwa makakala ga myai ya Mwana Ngondolo na kwa mayi'gi'yo ga Nnu'ngu' gabaabakiye bandu. Nabembe kiwo pasaegelile, baayogwipeli waa. 12 Kwa nyo mupulaikange mwenga mwa kunani, na mwaboti mwamutama mo. Lakini mwakibona mwamutama mudunia na mubaali, kwa mwanjaa yu'lu' Ibilisi ataikulilwe pai' na intwi'li nyongo, kwa mwanjaa atangite panga, nsimu wake wigali nsini bai."

13 Bai, li'lu' ling'ambo palikwipwile panga litaikulilwe pai' mudunia, ngalimpelemba yu'lu' mau' ywaapapike mwana nnalu'me. 14 Apo yu'lu' nnwawa aapeyilwe mapapayo gabi'li' ga tai nku'lu'. Agu'lu'ki kuutalu na palibile li'lu' ling'ambo, pandu papu'ngu'ti' papaabi'kilwe wiso kwa ywembe. Akwo akotelwe kwa myaka itatu na nusu. 15 Bu'kapo li'lu' ling'ambo ngalipiya masi' maingi munkano wake kati masi' ga mulibi'ndi', kagabutukya kwa yu'lu' nnwawa li'nga gakampu'twe. 16 Lakini bwi' ngaunkombwa yu'lu' nnwawa, ngauumukuka kati nkano na kugamila galu' masi' gagabu'ka kwa li'lu' ling'ambo. 17 Bai, ling'ambo lyo lyatikunkasilikya nnwawa ywo, ngaliibu'kya no yenda ku'mbwana na lubelekwo lwi'ngi' lwa nnwawa ywo, yani balu' babannyu'wa Nnu'ngu' na kunkong'ondelya Yesu. 18 Bai ling'ambo lyo ngaliyi'ma mbwega ya baali.