1 Bu'kapo nganimmona Mwana Ngondolo kati'kwana yundo ya muuli waulongolile wa miuli yi'lu' saba. Nganiyu'wa lilobe lya yumo ywa balu' bau'mi nsese kalongela kati lilobe lya njai kabaya, "Mwise!" 2 Panilingite naamweni falasi muu nnu'ngi' yangu'. Na ywamwu'bwike falasi ywo aabile na mpi'nde na aapeyilwe taji. Aamwimbiliye falasi yenda kunsinda ndumu li'nga apate usindi.

3 Bu'kapo, Mwana Ngondolo ngati'kwana muuli wenebi'li'. Nganinnyu'wa yu'lu' kyumbe mwu'mi ywenebi'li' kabaya, "Wise!" 4 Panilingite, nganimmona falasi ywi'ngi' ywa lukanda lukele kapitya. Ywamwu'bwike falasi yu' aapeyilwe makakala go bu'ya amani padunia li'nga bandu babulagane. Aapeyilwe lipanga liku'lu'.

5 Mwana Ngondolo pauti'kwaniye muuli wenetatu, nannyu'wine kyumbe mwene bwu'mi ywenetatu kabaya, "Wise!" Panilingite, naamweni falasi mwene lukanda lupili nnu'ngi' yangu'. Ywamwu'bwike falasi yu' aabile na kili'ngo so li'ngya utopau muluboko lwake. 6 Bu'ka pakatikati ya pabaabile balu' yumbe nsese, nganiyu'wa kili'be kati lilobe kakibaya, "Liposo lya kutwa yimo lyaapi'ma kilo simo bai sa bwembe wa ngano. Na liposo lya kutwa yimo lyaapi'ma kilo itatu bai ya bwembe wa shayiri*. Lakini kanewalabiye mauta wala divai."

7 Bu'kapo, Mwana Ngondolo ngati'kwana muuli wenensese. Nganinnyu'wa yu'lu' kyumbe mwu'mi ywenensese kabaya, "Wise!" 8 Nanenga nganilingulya na kumbe paabile na falasi na lukanda lwake lwa kiligu. Na lina lya ywamwu'bwike falasi ywo lyai Kiwo, na Kumambi' ammi'ngi'yage nsu'gu'. Abo baapeyilwe utawala bu'kana na lobo yimo ya dunia, baabulage bandu kwa lipanga, njala, tauni na kwa anyama akali' ba dunia.

9 Bu'kapo, Mwana Ngondolo ngati'kwana muuli wa tano. Nganipabona palu' pai' ya kibi'ki'lyo, loo ya balu' bababulagilwe kwa kitumbu sa kuliu'bi'lya liyi'gi'yo lya Nnu'ngu', na ukong'ondeli wabe wabaaupiyite. 10 Bai, baali'i kwa lilobe liku'lu', "We Bwana waubile wampeleteu na mwu'bi'li'ka, pakubawi pawaalu'a kwaukumu na kwabukiya babatama padunia kwa kitumbu so bulagilwa kwitu?" 11 Kila yumo ngapeyelwa nganju ndaso yene lukanda luu, baabakiyilwe bayendeli lolela kwa masu'ba, mpaka payatimya isabu ya atumisi ayabe na alongo babaabulagilwa kati bembe mwabaabulagilwe.

12 Bu'kapo nganimmona Mwana Ngondolo kauti'kwana muuli wa sita. Pauti'kwaniye bai, ngaupitya nnendemo nku'lu' padunia. Lisu'ba lyagalambwike lukanda, ngalibaa lipili kati makala, na mwei ngaubaa nkele kati myai. 13 Ndondwa ngaitu'mbu'kya pai' padunia kati itunda yangali komala mwaitu'mbu'ka munkongo wake pautikilwa na nsunga. 14 Kunani kumaunde ngakubu'yi'lwa kati likalatasi mwaliku'nji'lwa ku'nji'lwa, itu'mbi' na ndu'si' yoti paibile, yaatibu'yi'lwa. 15 Bu'kapo, akulungwa ba padunia, agoi, alongosi ba ngondo, matayili, bene makakala, abanda na angwana, baayu'bite mumapango na mumipi'mbi' ya itu'mbi'. 16 Ngabaibakia ayo itu'mbi' na maliwe ga mpi'mbi', "Mututu'mbu'ki li'nga mutwiye kuutalu na ywembe ywatama panani ya kiti'gu' sa lenji, na kuutalu na nyongo ya Mwana Ngondolo! 17 Kwa mwanjaa, lisu'ba lyalibi'kilwe lya nyongo yabe litimile. Nyai ywaibi'i wiso yi'ma nnu'ngi' yake?"