1 Bu'kapo nganikubona kunani kwaayambi' na dunia yayambi', kwa mwanjaa kunani kulongoi na dunia nongoi iyomwike pi'ta, na baali yaabileli kai'. 2 Nganiubona Muyi Mpeleteu, Yelusalemu yayambi', kawelya bu'ka kunani kwa Nnu'ngu', uyomwike nemekelwa kati nnwawa ywaku'nda kanni'nda nsengowe. 3 Na nenga nganiyu'wa lilobe liku'lu' bu'ka musi'lu' kiti'gu' sa lenji kalibaya, "Nambi'yambi' potamo wa Nnu'ngu' nga pamope na bandu, na ywembe alu'a tama pamope nabo. Bembe baalu'a panga bandu bake, na Nnu'ngu' mwene aapanga pamope nabo, na aalu'a panga Nnu'ngu' wabe. 4 Ywembe aalu'a ponwa moli gabe goti, nsimu wo bandu baawali wala usunika, kili'lo wala minya, kwa mwanjaa ube wo wa kwai'mbu' upite."

5 Na ywembe yu'lu' ywatami panani ya si'lu' kiti'gu' sa lenji ngabaya, "Lingulya, nipanga makowe ga goti baa gayambi'!" Kai' ngabaya, "Uandike makowe ga, kwa mwanjaa nga go aminika na ga kakape." 6 Nganibakia kai', "Gatimile! Nenga nga na Alfa na Omega, na Nnongoi na ywa Kuundi'la. Ywembe ywabile na nnyota, naalu'a kumpeya wabule masi' ga ukoti bu'ka mukinywanyu. 7 Balu' boti babaalu'a sinda baalu'a pokya aga goti, na naalu'a panga Nnu'ngu' wabe na bembe baalu'a panga bana bangu'. 8 Lakini bandu bene bwoga, bangau'bi'lya, asapu, bababulaga, apege, babi', babakilikitya inyago, pamope na abu'su' boti, bembe pandu pabe mulitanda lyaliyaka mwoto na bwaluti. Asi' nga kiwo senebi'li'."

9 Bu'kapo yumo ywa balu' malaika saba babaabile na mabakuli saba gagaatwi'li malanganyiko saba ga kuundi'la ngaisa kunibakia, "Wise, na nenga nilu'a kulaya ywaku'nda, lombolya nnyumbo wa Mwana Ngondolo." 10 Bu'kapo yu'lu' malaika nganipu'twa kwa Loo Mpeleteu, nganipeleka mpaka kukitu'mbi' kiku'lu' na kilaso, nganilaya muyi mpeleteu wa Yelusalemu, kawelya bu'ka kunani kwa Nnu'ngu'. 11 Waabile kaung'alang'atya kwa utukupu wa Nnu'ngu' kati liwe lya samani muno, kati yaspi, yaimelemetya kati kilolo. 12 Kwaabile na kingu'mbi' kiku'lu' na kilaso na saai na milyango ku'mi na ibi'li', na kila nniango waabile kauli'ndi'li'lwa na malaika yumo. Mumilyango yo paandikilwe maina ga makabila ku'mi na ibi'li' ga Isilaili. 13 Kwaabile na milyango itatu kwa lwingo lwa kumbwani, itatu lwingo lwa kibu'la, itatu lwingo lwa kusi na itatu ya lwingo lwa kundondi. 14 Ingu'mbi' ya awo muyi yaabile na misingi ku'mi na ibi'li', na panani yake paandikilwe maina ga balu' atumilwe ku'mi na abi'li' ba Mwana Ngondolo.

15 Aywo malaika ywalongelage na nenga aakamwi pimbo ya zaabu yo li'ngya awo muyi, li'ngya milyango yake na ingu'mbi' yake. 16 Muyi wo waabile na mbande nsese yailandana. Ulaso wake na bwipi wake waabile nsawani. Ngauli'nga awo muyi kwa ayo pimbo, nawembe waabile na ulaso, bwipi na kyi'mo kunako kilomita 2,400. 17 Ngali'nga kingu'mbi' sake, saabile na mita 60. Aywo malaika atumyage kili'ngo sabayobeli bandu li'ngya. 18 Kingu'mbi' so sasengilwe kwa maliwe ga samani ga yaspi, na muyi wene wasengilwe kwa zaabu mbeleteu yaing'alang'atya kati kilolo. 19 Misingi ya ingu'mbi' ya muyi wo yanemekilwe kwa kila sampuli ya maliwe ga samani ngu'lu'. Nsingi nnongoi waabile liwe lya samani lya yaspi, na lyenebi'li' liwe lya safilo, lyenetatu lyabile liwe lyalikemelwa kalikedoni na lyene nsese lyai liwe lya zumalidi, 20 lya tano lyaai liwe lya saldoniki, lya sita lyaai liwe lya akiki na lya saba lyaai krisolito, lya nane lyaai zabarajadi, lya tisa lyaai topazi, lya ku'mi lyaai krisoplaso, lya ku'mi na moja lyaai lya hiakinitho na lya ku'mi nebi'li' lyaai amethisito. 21 Yi'lu' milyango ku'mi na ibi'li' yaabile lulu ku'mi na ibi'li', kila nniango gumo waabile utengenesilwe kwa lulu yimo. Ndi'la ngu'lu' ya muyi wo yaabile ya zaabu mbeleteu yaimelemetya kati kilolo.

22 Nkati ya awo muyi naaibwenili nyumba ya Nnu'ngu', kwa mwanjaa Bwana Nnu'ngu' Mwene Makakala Goti na Mwana Ngondolo nga Nyumba ya Nnu'ngu'. 23 Wu'lu' muyi upalali bweya wa lisu'ba wala mwei, kwa mwanjaa utukupu wa Nnu'ngu' nga bweya wake na Mwana Ngondolo nga kimulikyo sake. 24 Mataipwa gaalu'a tyanga mubweya wake, na akulungwa ba dunia baaleta utayili wabe nkati yake. 25 Milyango yake katu yaayigalilwali, kwa mwanjaa kwaapilyali. 26 Bandu ba mataipwa goti padunia baalu'a leta utayili wabe na ili'be yabe ya samani nkati ya muyi wo. 27 Lakini kili'be kisapu katu saayingyali mo, wala mundu ywoywoti ywapanga makowe ga oni au ga ubu'su'. Ila babaalu'a yingya mo nga balu' babaandikilwe maina gabe mukitabu sa ukoto sa Mwana Ngondolo.