1 Bu'kapo yu'lu' malaika nganilaya libi'ndi' lya masi' ga ukoto, gagamelemetya kati kilolo kagabutuka bu'ka musi'lu' kiti'gu' sa lenji sa Nnu'ngu' na sa Mwana Ngondolo, 2 pi'tya pakatikati ya ndi'la ngu'lu' ya muyi wo. Mulwingo lwoti lwa libi'ndi' kwaabile na nkongo wa ukoti waupiya itunda ya sampuli ku'mi na ibi'li', upambiya itunda yake kila mwei, na maakapi ga nkongo wo nga ntela wa kugatepwa mataipwa. 3 Ntu'pu' kili'be sosoti sakikosite lasi sasaalu'a yingya mumuyi wo.

Na kiti'gu' si'lu' sa lenji sa Nnu'ngu' na Mwana Ngondolo saalu'a baa mumuyi wo, na atumisi bake baalu'a kunkilikitya Nnu'ngu'. 4 Na bembe baalu'a kummona kuminyo yake na lina lyake lyaandikilwa muibu'ngi' yabe. 5 Kilo saalu'a bali kai', wala baalu'a palali bweya wa kimulikyo au lumu, kwa mwanjaa Bwana Nnu'ngu' aalu'a panga bweya wabe, na bembe baalu'a tawala milele na milele.

6 Bu'kapo yu'lu' malaika nganibakia, "Mayi'gi'yo ga nga ga kakape na go u'bi'li'ka. Bwana Nnu'ngu' ywaalongoya alondoli aatumike malaika bake kwalaya atumisi bake galu' gagapalikwa pitya masu'ba gaganogano."

7 Yesu endabaya, "Lingulya, niisa kiyu'ngu'ya! Nantali yake yu'lu' ywagakamwa mayi'gi'yo ga ulondoli wa kitabu si'no."

8 Nenga na Yoani, ngaywanigayu'wine na kugabona makowe ga. Na nenga paniyomwike yu'wa na kugabona, naatu'i pai' nganikilikita pamagu'lu' ga yu'lu' malaika ywaabile kanilaya makowe go. 9 Lakini ywembe nganibakia, "Kaneupange nyo, nenga na ntumisi pamope nawenga na alongobo alondoli, na boti babagakamwa mayi'gi'yo ga kitabu si'. Bai, unkilikiti Nnu'ngu'!" 10 Nganibakia kai', "Kaneugaiye mayi'gi'yo ga kilondoli gagabile mukitabu si', kwa mwanjaa nsimu wo timya makowe go wegelile. 11 Bai, mundu ywapanga manyatau ayendeli panga, na ywabile nsapu ayendeli baa nsapu. Mundu ywapanga makowe ga aki, na ywembe ayendeli panga ga aki, na ywabile mpeleteu, na ayendeli baa mpeleteu."

12 Yesu endabaya, "Lingulya, niisa kiyu'ngu'ya! Upo yangu' ibile mumaboko gangu', na nenga naalu'a kumpeya kila mundu bu'kana na mwapangite. 13 Nenga nga na Alfa na Omega, na Nnongoi na ywa Kuundi'la, Ntumbuli na Nnyomoli."

14 Nantali yabe balu' babakusa makanju gabe, li'nga bapate aki ya kuuyendelya awo nkongo wa ukoti na kuuyingya awo muyi kwo pi'tya mumilyango yake. 15 Lakini panja ya muyi ngabatama bandu bene iyendo kati ya mbwa, babi', apege, abulagi, babakilikitya inyago na bi'ngi' babapenda longela ubu'su' na kwipanga anogau.

16 "Nenga na Yesu, nintumike malaika wangu' kukubakia makowe ga kwa kitumbu sa makanisa. Nenga nga na Mmelekwe wa lukolo lwa Daudi. Nenga nga na Ndondwa ya kindai' yaing'alang'atya muno."

17 Loo ywa Nnu'ngu' na ywaku'nda babaya, "Wise!" Na kila mundu ywayu'wa li', na abaye, "Wise!" Ywabile na nnyota, aise, na kila ywapala masi' ga ukoti anywe wabule.

18 Ninkwi'li'ka kila mundu ywayu'wa mayi'gi'yo ga ulondoli wa kitabu si', mundu ywoywoti mana ayongiye sosoti mumakowe ga, Nnu'ngu' aalu'a kunnyongeya malanganyiko gagabayilwe mukitabu si'. 19 Na mundu ywoywoti mana apu'ngwiye sosoti mumayi'gi'yo ga ulondoli wa mukitabu si', Nnu'ngu' aalu'a kumpokonywa aki yake yo lya itunda ya nkongo wa ukoti na aki yake yo tama mumuyi mpeleteu yaibayilwe mukitabu si'. 20 Na ywapiya ukong'ondeli wake bu'kana na makowe ga abaya, "Kakape, niisa kiyu'ngu'ya."

Amina. Wise wa Bwana Yesu!

21 Ninnu'bya mwaboti ngu'ngu' bu'ka kwa Bwana Yesu, Amina.