1 Bu'ka pa ago nganimmona malaika ywi'ngi' kaelya bu'ka kunani, abile na utawala nku'lu' na dunia ngaimulikilwa na bweya wake. 2 Bai, nganwaya kwa lilobe liku'lu' kabaya, "Utu'mbwike! Muyi nku'lu' wa Babeli utu'mbwike! Nambi'yambi' uyu'kite utamo wa masetani, kila sampuli ya moka maakau, iyuni njapu na inyama yaisukilwa na yaibile njapu. 3 Utu'mbwike kwa mwanjaa bandu ba mataipwa goti baainywile divai yake, baalobile na maminyikio gake ga upege. Akulungwa ba dunia baapangite nakwe upege, na asulusi ba dunia baatayilike bu'kana na maminyikio gangali kili'ngo."

4 Bu'kapo nganiyu'wa lilobe li'ngi' bu'ka kunani kalibaya,

"Mwabandu bangu' mubu'ke pakatikati yake,

li'nga kanemupange kiselele mumasambi gake,

mwaakane pata ukumu yake.

5 Kwa mwanjaa, masambi gake gambone,

gaikite ata kunani

na Nnu'ngu' agalibalyali malau gake.

6 Kati mwaapangi bi'ngi', na mwenga mumpangi nyinyonyo,

kai' mumpangi pabi'li' yake.

Mukikombe sake sa divai munnyangabani na kinywo kinammaba pabi'li' yake ya si'lu' saapeile bi'ngi'.

7 Mumpei ngu'su'mbu' na usuni yambone kati mwaikwi'yite kwo pata utayili wake. Kwa mwanjaa mumwoyo wake aipuna kwo baya, ‘Nenga niyi'ma kati malikia,

nenga na mau' nng'wi'li'kwa lili, na wala nausunikali!’

8 Kwa nyo malanganyiko gake gaalu'a kumpata kwa lisu'ba limo,

njala, usuni na kiwo.

Na ywembe aalu'a tiniyilwa mwoto,

Kwa mwanjaa Bwana Nnu'ngu' ywamukumu abile na uweso."

9 Akulungwa ba dunia babaapangite nakwe upege no panga nakwe kiselele muutayili wake, pabaalu'a libona lyoi lyo tinika kwake, baalu'a kunni'lya no lombola. 10 Akulungwa bo baalu'a yi'ma kuutalu na muyi wo kwo yogopa ngu'su'mbu' yake, baalu'a li'la kababaya, "Baakibona! Baakibona ba muyi nku'lu' wa Babeli wene uweso! Kwa mwanjaa mulisaa limo bai, ukumu yako ikuisilile."

11 Na asulusi ba dunia baalu'a kunni'lya no lombola, kwa mwanjaa ntu'pu' bandu bo pi'ma ili'be yabe. 12 Ntu'pu' mundu kai' ywo pi'ma ili'be ya zaabu, ya yu'ma ya samani, ya maliwe ga samani na ya lulu, kitani na ngu'bo ya lukanda lwa sambalau, alili na ngu'bo ngele, mbago ya samani, na yombo yaitengeneswile na mbembe ya ndembo, mikongo ya samani ngu'lu', shaba, kyu'ma na malumalu. 13 Ntu'pu' mundu ywo pi'ma mdalasini, ndakyo, ubani, manemane, udi, divai, mauta, bwembe sapi na ngano, ng'ombe na ngondolo, falasi na mimutuka yo kwakwata, na abanda na ata maisa ga bandu. 14 Babapanga nsuluso baalu'a baya panga, "Ili'be yayaabile kawiipenda muno iyomwike. Utayili wako woti na ugolou wako uyomwike, wala iwesekanikali pata kai'." 15 Balu' babaapangite usulusi wo no tayilika bu'kana na ywembe, baalu'a yi'ma kuutalu nakwe kwa bwoga nku'lu' wa ngu'su'mbu' yaimpata. Baalu'a li'la no lombola, 16 kababaya, "Waakibona! Waakibona, wa muyi nku'lu', wawaayobeli wala ngu'bo ya kitani, ya lukanda lwa sambalau na ngele, na kwinemeka kwa zaabu, maliwe ga bei ngu'lu' na lulu. 17 Nkati ya lisaa limo bai, utayili wambone kati wu', walabiyilwe!"

Bu'kapo ayendelesi ba ngalaba na boti bababile mumwanja wo, na apanga kasi ya mubaali, baayi'mi kuutalu, 18 ngabali'la muno pabalibweni lyoi lya mwoto wo tinika kwake, ngababaya, "Kunabaali muyi nku'lu' kati wu'?" 19 Ngabaiyitya ligu mumitwe yabe, ku'no kabali'la no lombola, kababaya, "Bakibona! Bakibona, mwamuyi nku'lu', muyi wautupangite twaboti twabene ngalaba tube twamatayili kwa kitumbu sa utayili wake. Lakini kwa lisaa limo bai waatilangamiswa."

20 "Mupulaike mwenga mwa kunani, mwabandu ba Nnu'ngu', atumilwe pamope na alondoli bake, mupulaike kwa kitumbu sa makowe gagapitike mumuyi wu'lu', kwa mwanjaa Nnu'ngu' ampeile aki yinu kwa kwaukumu bembe."

21 Bu'kapo malaika yumo mwene uweso ngatu'ndu'bi'ya liwe lyalilandana na liwe liku'lu' lyo yagya. Ngalitaikwa mubaali kabaya, "Amo ngamwawataikulwa muyi nku'lu' wa Babeli na wembe waalu'a bonekanali kai'. 22 Wala lilobe lya ayi'mbi na babaoneya inanda, pilimbi na lipenga yaalu'a yu'wanikali kai' kasako. Ntu'pu' nng'anga ywoywoti ywaalu'a patikana nkati yako, wala lilobe lya liwe lyo yagya lyalu'a yu'wanikali kai' nkati yako. 23 Bweya wa kimulikyo waabonekanali kai' nkati yako, wala waalu'a yu'wali lilobe lya si'li'ku'si'li'ku' ya ywakobeka wala ku'nda. Asulusi bako baabile bandu babatanganikwa muno padunia, na kwa bwabi' wako mataipwa goti gaatiobeyelwa.

24 "Muyi wo wapwatilwe kwa mwanjaa mo yaapatikine myai ya alondoli, na ya apeleteu na ya bandu boti bababulagilwe padunia."