1 Nenga na mpi'ndo wa kanisa, nikuandikya wenga wa mau' wausaulilwe na Nnu'ngu', pamope na bana bako. Nenga kakape nimpendile, na kwenda nenga baili, ila na bi'ngi' boti babaitangite yi'lu' kweli. 2 Nimpendile kwa kitumbu sa wu'lu' ukweli wautama nkati yitu, nawembe upala tama pamope na twenga milele.

3 Ngu'ngu', kiya na amani yaibu'ka kwa Tati' Nnu'ngu' na kwa Yesu Kilisitu Mwana wa Tati', ilu'a baa pamope na twenga muukweli na upendo.

4 Naatipulaika muno kwabona bi'ngi' ba bana bako kabatama muukweli, kati mwabatuamulise Tati'. 5 Na nambi'yambi' mau' nendakunnu'ba panga, tupendane, na yi'no kwenda amuli yaayambi' lili, ila nga amuli yi'yi'lu'yi'lu' ya twaabile nayo bu'ka tokyaa. 6 Na wu'no nga upendo, tutame kwo kota amuli ya Nnu'ngu', na yi'no nga yi'lu' amuli, yamwaaiyu'wine bu'ka tokyaa panga, mupalikwa mwaboti tama muupendo.

7 Kwa mwanjaa abu'su' baingi bapitike padunia, bandu babakotoka yi'ki'tya panga Yesu Kilisitu aaisi kiyi'ga. Mundu ywoywoti ywabaya nyo, aywo nga mmu'su' kai' nga nndumu wa Kilisitu. 8 Bai, mwilinguli mwabene li'nga kanemuobeye si'lu' samuyomwike kukipangya kasi, ila mupate upo yinu yaitimilike.

9 Mundu ywoywoti ywakotoka tama nkati ya mayi'gano ga Kilisitu, ywembe ywo ntu'pu' Nnu'ngu'. Lakini ywayendelya kugakamwa mayi'gano ga Kilisitu, aywo abile na Tati' Nnu'ngu', kai' na Mwana wake. 10 Bai, mana kubile na mundu ywoywoti ywaisa kasinu kakotoka kunnetya mayi'gano go, kanemunkemi munyumba yinu na wala kanemumpange abali. 11 Mwanjaa ywampanga abali mundu ywo, apanga kiselele nakwe mumakowe gake malau.

12 Nibile nago gambone gakummakia, lakini ngani tumya kalatasi na bwino. Paali pake nipala isa kasinu no longela namwenga katulolana, li'nga pulaa yitu ipate timilika. 13 Bana ba nku'go muimani ywasaulilwe na Nnu'ngu', bendakusalimia.