1 Kila mundu ywau'bi'lya panga Yesu nga Kilisitu, aywo abelekwi kwa Nnu'ngu'. Kila ywaapenda Tati', ampenda ata mwana ywabelekwi kwa Tati' bo. 2 Tutangite panga twapenda bana ba Nnu'ngu', kwa kumpenda Nnu'ngu' na kwiyu'wa amuli yake. 3 Kumpenda Nnu'ngu' nga kwiyu'wa amuli yake, na amuli yake itopiteli. 4 Kwa mwanjaa, kila ywabelikwe na Nnu'ngu' dunia endakwisinda, kwisinda dunia yo nga kwa ndi'la ya imani yitu. 5 Nyai ywakombwa kwisinda dunia? Ntu'pu' ila yu'lu' bai ywau'bi'lya panga Yesu nga Mwana wa Nnu'ngu'.

6 Yesu Kilisitu nga ywaisi kwa masi' ga ubatiso na myai yo waa kwake. Aaisili na masi' bai, ila pamope na masi' na myai, naywembe Loo nga ywakong'ondelya likowe lyo kwa mwanjaa Loo nga ywa kakape. 7 Kwa nyo kubile na ili'be itatu yaikong'ondelya abali ya Yesu. 8 Loo, masi' na myai, na ili'be yo itatu yendayi'ki'tyana. 9 Mana katuyi'ki'tya ukong'ondeli wa bandu, ukong'ondeli wa Nnu'ngu' nga nku'lu' muno. Wu'no nga ukong'ondeli waupiyite Nnu'ngu' kwa Mwana wake. 10 Kila ywamwu'bi'lya Mwana wa Nnu'ngu' mumwoyo wake abile nawo ukong'ondeli wo, na kila mundu ywakotoka kumwu'bi'lya Nnu'ngu' ammaya ywembe mmu'su'bu'su', kwa mwanjaa awu'bi'li lili ukong'ondeli wa Nnu'ngu' waupiyite bu'kana na Mwana wake. 11 Ukong'ondeli wene nga wu'no, panga Nnu'ngu' atupei ukoti wangayomoka, na ukoti wo upatikana kwa ndi'la ya Mwana wake. 12 Ywoywoti ywabile nakwe Mwana wa Nnu'ngu', aywo abile nawo ukoto wo, na ywangali baa na Mwana wa Nnu'ngu', ntu'pu' ukoti wo.

13 Nimwandikyanga li'nga mupate tanga panga, mwenga mwamuu'bi'lya lina lya Mwana wa Nnu'ngu' mubile nawo ukoti wangayomoka. 14 Na twenga tubile na liu'bi'lyo nnu'ngi' ya Nnu'ngu' panga twendakombwa lu'ba sosoti kati mwapendi ywembe, na endatupi'kania. 15 Bai manaitei tutangite panga si'lu' satunnu'ba endatupi'kania, tutange kai' panga satunnu'ba endatupeya.

16 Mundu mana amweni muumini nnyine kapanga sambi yaikotoka kumpelekya kiwo, apo ipalikwa kunnu'bya, na Nnu'ngu' aalu'a kumpeya ukoti. Nilibaya likowe li'no kwa balu' babapangite sambi yaikotoka kumpelekya kiwo. Lakini ibile sambi yi'ngi' yaipelekya kiwo, na nenga nibayali panga ipalikwa kunnu'bya kwa Nnu'ngu' kwa kitumbu so.

17 Kila kyendo sangali aki nga sambi, lakini ibile sambi yangali kumpeleka mundu mukiwo.

18 Tutangite panga kila ywabelekwi kwa Nnu'ngu' apangali sambi, kwa mwanjaa Yesu, Mwana wa Nnu'ngu', endakunni'ndi'la na yu'lu' Nnau akombwali kunsulu.

19 Tutangite panga twenga twabana ba Nnu'ngu', pamope no panga dunia yoti ibile pai' ya utawala wa Ibilisi.

20 Kai' tutangite panga Mwana wa Nnu'ngu' aisile, na atupei ilimu li'nga tuntange Nnu'ngu' wa kakape. Tubile na umope na Nnu'ngu' wa kakape kwo baa na umope na Mwana wake Yesu Kilisitu. Ayu' nga Nnu'ngu' wa kakape na nga ukoti wangayomoka.

21 Mwabana bangu' mwamupendilwe, mwili'ndi'le bu'kana no kilikitya inyago.