1 Mwaapendwa bangu', kanemwiu'bi'li kila loo, ila mwili'nge wi'ti' li'nga mutange panga ibu'ka kwa Nnu'ngu' au lili, kwa mwanjaa alondoli bambone ba ubu'su' bayomwike pitya padunia. 2 Ndi'la ya kuntanga Loo wa Nnu'ngu' nga yi'no, panga loo yainnyi'ki'tya Yesu Kilisitu aaisi kiyi'ga, ibu'ka kwa Nnu'ngu'. 3 Lakini kila loo yaikana kunnyi'ki'tya Yesu, ibu'kali kwa Nnu'ngu'. Ayo nga loo ya nndumu wa Kilisitu yamwaaiyu'wine panga yendaisa, na nambi'yambi' iyomwike isa mudunia.

4 Lakini mwenga nga mwabana bake Nnu'ngu' na muyomwike kwasinda alondoli ba ubu'su', kwa mwanjaa Loo ywabile nkati yinu nga mwene makakala maku'lu' kulikoni ywabile nkati ya bandu ba dunia. 5 Alondoli ba ubu'su' nga bandu ba dunia, kwa nyo balongelya makowe ga dunia, na bandu ba padunia bendakwapi'kania. 6 Lakini twenga twabake Nnu'ngu'. Mundu ywantangite Nnu'ngu' endatupi'kania, na mundu ywangali ywa Nnu'ngu' atupi'kaniali. Bai, kwa ndi'la yo twendakombwa kwipwa Loo ywa kakape na loo wa ubu'su'.

7 Mwaapendwa bangu', tupendane, kwa mwanjaa upendo ubu'ka kwa Nnu'ngu'. Kila mundu ywabile na upendo, aywo abelekwi kwa Nnu'ngu' na antangite Nnu'ngu'. 8 Mundu ywangali upendo, aywo antangiteli Nnu'ngu' kwa mwanjaa Nnu'ngu' nga upendo. 9 Nnu'ngu' aalayite upendo wake kwitu, kwa kuntuma Mwana wake wa kisake mudunia li'nga tupate ukoto wangayomoka kwa ndi'la yake. 10 Wu'no nga upendo, kwenda twenga twalongoli kumpenda Nnu'ngu' lili, ila ywembe ngaywaatupendile, ngaantuma Mwana wake li'nga apange salaka ya kutuawana na Nnu'ngu' kwa kitumbu sa masambi gitu.

11 Mwaapendwa bangu', kwa mwanjaa Nnu'ngu' aatupendi twenga, nyinyonyo ipalikwa na twenga tupendane. 12 Ntu'pu' mundu ywaamweni Nnu'ngu' ata pasene, lakini mana katupendana Nnu'ngu' atama nkati yitu na upendo wake wendatimilika nkati yitu.

13 Tutangite panga twenga tutama nkati ya Nnu'ngu' na Nnu'ngu' atama nkati yitu, kwa mwanjaa atupei Loo wake. 14 Twenga twiibweni na twendakong'ondelya kwa bi'ngi' panga Tati' baantumike Mwana wabe panga Nkomboli wa bandu boti. 15 Kila mundu ywayi'ki'tya panga Yesu nga Mwana wa Nnu'ngu', mundu ywo Nnu'ngu' atama nkati yake na ywembe nkati ya Nnu'ngu'. 16 Kwa nyo, twenga tutangite na tuu'bi'lya upendo wabile nawo Nnu'ngu' kwa kitumbu situ.

Nnu'ngu' nga upendo. Kila ywatama nkati ya upendo, atama nkati ya Nnu'ngu' na Nnu'ngu' atama nkati yake. 17 Mana upendo wa Nnu'ngu' utimilike nkati yitu, twapanga ntu'pu' kyukala mulisu'ba lya Nnu'ngu' kwiukumu dunia, kwa mwanjaa tutama kati mwaatami Yesu mudunia. 18 Mundu mwene upendo ntu'pu' bwoga. Upendo wa kweli ubu'ya bwoga woti, kwa mwanjaa yogopa ukumu ngakwapanga bandu babe na bwoga. Mundu mwene bwoga, aywo upendo unatimilikali nkati yake.

19 Twenga tubile na upendo kwa mwanjaa Nnu'ngu' aalongoli wi'ti' kutupenda twenga. 20 Mundu mana kabaya panga ampendi Nnu'ngu' ku'no kansukya mumini nnyine, aywo apanga mmu'su' kwa mwanjaa mundu ywansukya mumini nnyine ywammona, akombwali kumpenda Nnu'ngu' ywangali kummona. 21 Yi'no nga amuli yaatupei Kilisitu, panga ywoywoti ywampenda Nnu'ngu' apalikwa kwapenda aumini aine.