1 Abali yi'no ibu'kana na Liyi'gi'yo lya ukoti lyalyabile tangu' kwai'mbu'. Twenga twaaliyu'wine na kulibona kwa minyo gitu twabene, twaatililola na kulikunywa kwa maboko gitu. 2 Ukoti wo pawaapitike twenga twaaubweni, kwa nyo twendakuukong'ondelya na kummakiyanga abali yaibu'kana na ukoti wo wa milele, wawaabile pamope na Tati' na waabonekine kwitu. 3 Satukibweni na kukiyu'wa nga satukinwaya kasinu kai', li'nga na mwenga mupange kiselele na twenga muumope watubile nawo na Tati' na Mwana wabe Yesu Kilisitu. 4 Tumwaandikya mwenga makowe gano li'nga pulaa yitu itimilike.

5 Yi'no nga abali yatwiyu'wine bu'ka kwa Yesu Kilisitu na kwiala kasinu panga, Nnu'ngu' nga bweya na nkati yake ntu'pu' lubi'ndu' lwolwoti. 6 Mana tubaite panga tubile na umope na Nnu'ngu' lakini popopo katutama mulubi'ndu', tulongela ubu'su' na yendo yitu ya ubu'su'. 7 Lakini mana katutama mubweya kati mwabile mwene Nnu'ngu', bai twaalu'a baa na umope twabene na bene na myai ya Mwana wake Yesu yaatupeleteya masambi gitu goti.

8 Mana katubaya panga twenga ntu'pu' sambi yoyoti, twikonga twabene na ukakape ntu'pu' nkati yitu. 9 Lakini mana twaagalambuka bu'ka mumasambi gitu nnu'ngi' ya Nnu'ngu', ywembe aatusamya na kutupeleteya ulau witu, kwa mwanjaa ywembe mwu'bi'li'ka na mwene aki. 10 Mana katubaya panga tunapangali sambi, tummaya Nnu'ngu' mmu'su'bu'su' na ukakape wa liyi'gi'yo lyake ntu'pu' nkati yitu.