1 Mwaapendwa bangu', yi'no nga balua yangu' yenebi'li' yanimwandikyanga, mubalua yoti yi' nipaya yumuya mabinio ginu manogau li'nga mupate ku'mbu'kya makowe ga. 2 Nipala mwenga muku'mbu'ki mayi'gi'yo gagabayilwe kwai'mbu' na alondoli apeleteu ba Nnu'ngu', na yi'lu' amuli ya Bwana na Nkosopoli yamupeyilwe pi'tya kwa atumilwe. 3 Wi'ti' mupalikwa tanga panga, masu'ba ga kuundi'la baalu'a pitya bandu bene misalango, babakota maminyikio gabe maakau, 4 kababaya panga, "Yesu aalagi isa! Tumbwelelo ai kwaku'? Bu'ka au'ku' bitu pabawile, makowe goti gabile nyanyalu'nyalu' kati mwagaabile bu'ka umbilwa kwa dunia!" 5 Lakini bembe kwa lipu'njo balibalya panga Nnu'ngu' aaumbike kunani na dunia kwa liyi'gi'yo. Dunia yaaumbilwe bu'ka mumasi' na kwa ndi'la ya masi'. 6 Nyinyonyo kwo bu'kana na nkukulo wa dunia ya nsimu wu'lu' yaatilangamiswa. 7 Lakini kwa liyi'gi'yo lyolyo Nnu'ngu' abi'kite kunani na dunia yi'no ya nambi'yambi', li'nga aialabiye kwa mwoto. Abi'kite wiso kwa kitumbu sa lisu'ba li'lu' lyo ukumu bandu bangali kunkilikitya Nnu'ngu', apo ngapabaalangamiswa.

8 Lakini mwaapendwa bangu', kanemulibali likowe limo li' panga nnu'ngi' ya Bwana Nnu'ngu', lisu'ba limo nga kati myaka elupu yimo, na myaka elupu kwake ywembe nga kati lisu'ba limo bai. 9 Bwana asi'yali kulitimilisa lilagano lyake kati bandu bi'ngi' mwabagania panga aalu'a si'ya. Paali pake, ywembe endakunkomeyanga kwa mwanjaa akani mundu ywoywoti alangamiswe, ila kila mundu anng'alambuki ywembe.

10 Lakini lisu'ba lyo buya Bwana lyaalu'a isa kati mwii. Apo kunani kwabu'ki'ka kwa mwago nku'lu', na kila kili'be sa kibelekwe satiniyilwa na dunia pamope na kila kili'be sakibile mo saumukulwa na Nnu'ngu'. 11 Kwa mwanjaa kila kili'be saalabiyilwa kubi nnya, buli mwenga mupalikwa baa mwabandu gani? Mupalikwa tama maisa mapeleteu ga kunnyu'wa Nnu'ngu', 12 kamuli'nda no imilisa isa kwa lisu'ba lyo lya Nnu'ngu'. Lisu'ba lyo lyaleta kunani sonjelwa mwoto no bu'yi'lwa na ili'be ya kibelekwe yalembuka. 13 Lakini bu'kana na lilagano lyake, twenga tupi'kanilya kunani kwaayambi' na dunia yaayambi', yalu' yaitama aki nkati yake.

14 Kwa nyo mwaapendwa bangu', kwa mwanjaa mupi'kanilya go, mukasane li'nga mube na mwoyo mpeleteu, pangali laumilwa no baa na amani nnu'ngi' ya Nnu'ngu'. 15 Mutange panga Bwana witu aakomeya bandu li'nga bapate lipala lyo kosopolelwa, kati mwaamwandikile mpendwa witu Pauli, kwa ikima yaapeyilwe na Nnu'ngu'. 16 Mubalua yake yoti aalongeli makowe go, gabile makowe gambone na gaganonwipe kugatanga. Makowe go bandu alalo na bangali komala muimani, bendagaobeya, kati mu'lu' mwabagaobeya Maandiko Mapeleteu gi'ngi'. Kwa nyo baipalya bene kitumbu so langamiswa.

17 Mwaapendwa bangu', nambi'yambi' mutangite makowe ga, kwa nyo mwili'ndi'le li'nga mwaakane kongelwa na makosa ga bandu alau, no tu'mbu'ka bu'ka muimani yinu yaikomile. 18 Ila muyendeli ku'la mungu'ngu' ya kuntanga Bwana na Nkosopoli witu Yesu Kilisitu. Utukupu ubile kwa ywembe nambi'yambi' ata milele! Amina.