1 Nenga na Simoni Petili, ntumisi na ntumilwe wa Yesu Kilisitu, nimwandikyanga mwenga, mwamupatike imani ya samani ngu'lu' kati yitu kwa ndi'la ya aki ya Yesu Kilisitu ywembe nga Nnu'ngu' na Nkosopoli witu.

2 Ninnu'bya ngu'ngu' na amani yambone kwa ndi'la ya kuntanga Nnu'ngu' na Yesu Bwana witu.

3 Nnu'ngu' kwa uweso wake, atupei makowe goti gatugapala, li'nga tube na ukoti no tama mumaisa ga kunnyu'wa Nnu'ngu', kwa kuntanga ywembe ywatukemite kwa utukupu wake na unogau wake mwene. 4 Kwo pi'tya go, atuyalile upo ngu'lu' na ya ngama muno yaatulagile, li'nga kwa upo yo, mupate yepa ulau waubile padunia, waubu'kana na maminyikio manyatau no panga kiselele muube wa Nnu'ngu'. 5 Kwa kitumbu so, mukasane muno yongeya unogau muimani yinu, na muunogau winu muyongeye ilimu, 6 na muilimu yinu muli'ngi'li, no li'ngi'lya kwo komeya, komeya kwinu panga mwapala Nnu'ngu', 7 na mwapala Nnu'ngu' panga kwa upendano wa kinolongo, na muupendano wa kinolongo, upendo wa Nnu'ngu'. 8 Kwa mwanjaa aga goti mana gabile nkati yinu no yendelya ku'la, gaalu'a wesa kumpanga mubeleye itunda inannoga yainnaya mwenga kuntanga Bwana witu Yesu Kilisitu. 9 Lakini mundu ywangali baa na makowe kati ga, aywo nga mbulibuli na alibalile panga aayomwike peleteyelwa sambi yake ya kwai'mbu'.

10 Bai, mwaalongo bangu', mukasane muno kuukong'ondelya mkemo winu no saulilwa kwinu na Nnu'ngu'. Mana mwaatama nyo, katu mwaaku'balali, 11 ila, mwaalu'a yi'ki'ti'lwa peyelwa aki yaitimilike yo yingya muukulungwa wa milele wa Bwana na Nkosopoli witu Yesu Kilisitu.

12 Kwa nyo naalu'a yendelya kunku'mbu'ki'ya makowe ga masu'ba goti, pamope no panga mugatangite na mukangamile muukakape wamuupokile. 13 Niibona panga, inogeleli nsimu woti panibaa pano padunia, nipalikwa kunku'mbu'ki'ya bu'kana na makowe ga. 14 Nibaya nya kwa mwanjaa nitangite Bwana witu Yesu Kilisitu aatiniumukulya panga, naalu'a bu'ka pano padunia, na nenga nibona nsimu wo wegelile. 15 Bai, nilu'a binia panga nyo kwo kasana, li'nga bu'ka pakiwo sangu' mwaawese kugaku'mbu'kya makowe ga.

16 Patunnyi'ganage bu'kana na uweso wo isa kwake, Bwana witu Yesu Kilisitu, twaau'bi'li lili ngongo ya kwai'mbu', yayaandikilwe kwa ung'anga, ila twaubweni utukupu wake kwa minyo gitu. 17 Mwanjaa aapatike isima na utukupu bu'ka kwa Tati' Nnu'ngu', apo palimwisilile lilobe bu'ka kwake ywembe ywabile Ntukupu Nku'lu' kalibaya, "Ayu' nga mwana wangu' ywanimpendile, ywaninogelile." 18 Kai', twenga twabene twaaliyu'wine lilobe lyo, bu'ka kunani, patwaabile pamope nakwe panani ya si'lu' kitu'mbi' kipeleteu.

19 Na twenga tubile nalyo li'lu' liyi'gi'yo lya kilondoli lyalikangamile pi'ta, mana mulilingulile kati kimulikyo sakimulika pandu poti palubi'ndu', mpaka lisu'ba li'lu' palyalu'a saa na bweya wa lutondwa lwa kindai' palwaalu'a ng'alang'atya mumyoyo yinu. 20 Lakini bu'ka pa ago goti muku'mbu'ki panga ntu'pu' ulondoli wa Maandiko Mapeleteu wa kwapanga alondoli baawanikiye bu'kana na mwabawasa bene. 21 Mwanjaa ntu'pu' liyi'gi'yo lya kilondoli lyalibu'kana na mwapala mundu. Ila bandu babalondwa balongoyelwa na Loo Mpeleteu.