1 Paapitike alondoli ba ubu'su' nkati ya bandu, nyinyonyo na balimu ba ubu'su' baalu'a pitya nkati yinu. Baalu'a yingiya mayi'gano gagaobeya ukakape na kunkana Bwana ywaakosopolile. Kwa ndi'la yo yaapanga kitumbu so langamiswa kwabe kiyu'ngu'ya. 2 Na bandu baingi baalu'a kwikota ndi'la yabe ndau, na kwa kitumbu sa abo, baingi baalu'a salawa ndi'la ya kakape ya Bwana. 3 Kwa maminyikio gabe manyatau baalu'a kummakia ngongo ya ubu'su' li'nga bapate si'lu' sabapala bu'ka kwinu. Lakini bu'ka kwai'mbu', ukumu yabe ibi'kilwe wiso no langamiswa kwabe kwegelile.

4 Malaika pabaapangite sambi, Nnu'ngu' aabi'kili kiya, ila aataikuli kumambi' akwo baatama muutabilwe wa lubi'ndu' mpaka yaaise ukumu. 5 Nnu'ngu' aaibi'kili kiya dunia ya kwai'mbu' palu' paaletike nkukulo bu'kana na bandu balu' bangali kunkilikitya Nnu'ngu', lakini yu'lu' Nuu ywaai nkong'ondeli wa aki, aatikosopolelwa, pamope na bandu bi'ngi' saba. 6 Nyinyonyo Nnu'ngu' aipwatile mili'ma ya Sodoma na Gomola, ngailangamisa kwa mwoto no baa ligu. Apo alayage mpwano wa makowe gagaalu'a pitya kwa bandu alau. 7 Nnu'ngu' ngankosopolya Lutu, mundu mwene aki, ywaausunike muno bu'kana na nnyendo wabe nnyatau wa abo bandu alau. 8 Mundu ywo mwene aki aabile katama pakati yabe kwa masu'ba maingi, mpaka aati'kwanike mwoyo muno kwa kitumbu sa nnyendo wabe nnyatau waauyu'wine na kuubona. 9 Kwa nyo, Bwana Nnu'ngu' atangite bu'kana na kwakosopolya bandu babannyu'wa bu'ka mumapayilwo. Kai' atangite mbwatyo yabaapata apanga sambi lisu'ba li'lu' lya ukumu, 10 muno balu' bababi'ngi'ya maminyikio manyatau ga yi'ga no salawa amuli ya Nnu'ngu'.

Balimu bo ba ubu'su' babile na kipi'li' so tauka na kwipuna, wala bayogopa lili kwitukana yumbe itukupu ya kunani. 11 Pamope no panga malaika babile na makakala muno, lakini basitakyali, wala kwitukana yumbe yo nnu'ngi' ya Bwana Nnu'ngu'. 12 Bandu bo babatukana sangalikitanga, nga kati inyama yangali malango, bo boyolwa no sinjilwa! Na abo baalu'a langamiswa kati inyama. 13 Na baalu'a li'pi'lwa mateso kati galu' gabaapangile bandu bi'ngi'. Bapulaikya panga makowe maakau pabandu. Ata pabalya pamope na mwenga mumakalamu ginu, bapulaika kunkonga. Kwa ndi'la yo bembe babile kati malembele mungu'bo uu. 14 Minyo gabe gatwi'li upege, katu balekali panga sambi. Bandu bene imani yangakomala, basopelwa bapange malau gabe. Baiyobelike myoyo yabe minyikia mali, bandu bo bakosite lasi! 15 Ngabaileka ndi'la yaisu'mbu'lwike, ngabaoba no kota ndi'la yaikotike Balaamu mwana wa Boeri, ywaapendile pata pwaila kwo panga malau, 16 lakini aakalipilwe kwa kitumbu sa ulau wake. Mbu'nda nga kinyama lakini aalongei kwa lilobe lya mundu, li'nga kumwibya nnondoli ywo akotoke panga makowe ga kililalu'.

17 Bandu ba nga kati kinywanyu sakiyu'mike, na nga kati maunde ga ula gagaku'ngu'lu'ka na limbu'nga pangali nia, potamo wabe pabi'kilwe wiso palubi'ndu' luku'lu'. 18 Kwo longela mayi'gano ga kwipuna na gangali ngama, no tumya maminyikiyo gabe malau ga kiyi'ga, baapi'ndi'ka balu' bababile kuutalu na balu' babatama muukongi. 19 Balimu bo baakong'ondelya ayabe uulu, kumbe bene nga abanda ba sambi, mwanjaa mundu apanga mmanda kwa kili'be si'lu' sakintawala. 20 Mana bautilike ulau wa dunia kwa kuntanga Bwana na Nkosopoli witu Yesu Kilisitu, bu'kapo ngabakola kai' na ulau wo no sindwa, ali yabe yaalu'a panga inannyata muno kulikoni ya palongoi. 21 Nantali yabe bakakotoka kwitanga kabisa ndi'la ya aki, kulikoni kwitanga bu'kapo kwileka yi'lu' amuli mbeleteu yabapokile. 22 Ibile ngongo yaibaya, "Mbwa agaki'li'bu'ki matapi gake mwene," na yi'ngi' ibaya, "Ngu'be ywagu'lu'li'lwe agalabwike kai' mumatope!" Nga mwaibile kwabe nambi'yambi'.