1 Nenga na mpi'ndo pakati yinu mwaapi'ndo ayangu', ninkong'ondelya kwo lola kwa minyo gangu' mateso ga Kilisitu no panga kiselele wu'lu' utukupu wawaalu'a umukulwa, nendakunnu'ba muno, 2 mulisunge lipi'nga lya Nnu'ngu' lyalibile kasinu na kuliyi'mi'li'ka, kwenda kwo li'ndi'ndi'lwali, ila kwo penda wamwene kati mwapala Nnu'ngu', kwenda kwo pala mbanje ya oni li, ila kwa mwoyo. 3 Kanemwatawale kwa makakala abo bababi'kilwe pai' ya uli'nda winu, ila mube mwabandu bo yigilwa kwa alyo lipi'nga. 4 Na wakati wo pitya Nsungi Nku'lu', mwenga mwapokya taji ya utukupu yangali alabika.

5 Nyinyonyo, namwenga mwaang'elo muimani mupalikwa kwibi'ka pai' ya utawala wa api'ndo binu. Mwenga mwaboti mupalikwa mugegekeyane, kwa mwanjaa Maandiko Mapeleteu gabaya, "Nnu'ngu' aataukya babaipuna, lakini apeya ngu'ngu' babagegekeya." 6 Bai, mugegekeye pai' ya luboko lwa Nnu'ngu' lwene makakala li'nga amwu'bu'ye pansimu waupwaika. 7 Mumpei Nnu'ngu' maauko ginu goti, kwa mwanjaa ywembe endakwisuluya muno kwa makowe ginu.

8 Mube minyo, mukeleke! Kwa mwanjaa nndumu winu Ibilisi endati'li'tati'li'ta kati imba ywabunguluma kampala mundu wa kuntangya na kummila. 9 Munkani Ibilisi, bu'kapo muyi'me kwo kangamala muimani yinu, kamutanga panga alongo binu padunia yoti bapi'tya mateso nyinyonyo kati gamubile nago. 10 Bu'ka po teselwa kwa masu'ba masene, Nnu'ngu' ywa ngu'ngu' yoti ywankema panga kiselele muutukupu wake wangali yomoka kwo lu'mbana na Kilisitu, ywembe mwene aalu'a kunkangamaya na kunkong'ondelya, kumpeya makakala na nsingi nkangamau. 11 Ywembe nga Nnu'ngu' mwene uweso kwa milele na milele. Amina.

12 Kwa luboko lwa Silwano, nnongo ywau'bi'li'ka kati mwanitangite, nimwandikya kwa mayi'gi'yo maipi, li'nga kunsenga na kunkong'ondelya panga ayi' nga ngu'ngu' ya kweli ya Nnu'ngu'. Muyi'me kwo kangamala kwa yo.

13 Asaulilwa ainu ba kanisa lya pano pa Babeli, bendakunsalimia. Kai', na Maluko, ywembe mwana wangu' muimani, endakunsalimia. 14 Musalimiyane kwa upendo wa kweli.

Ninnu'byanga mwaboti mwamubile mu Kilisitu amani ibe kwinu.